Mbase në media kanë qarkulluar lajme të ndryshme për Vllazninë në lidhje me dështimin e fazës përgatitore, dështimin në merkato apo gjëra të tilla, por vetë pjestarët e saj nuk mendojnë kështu. Në rradhët e skuadrës por edhe tek drejtuesit duket se ka optimizëm në prag të sfidës me Kukësin, e para e këtij viti. Siç ka njoftuar vetë klubi shkodran përmes faqes së tij zyyrtare, drejtuesit e Klubit të Futbollit Vllaznia kanë zhvilluar një takim me skuadrën pas seancës stërvitore të ditës së sotme.
Administratori i klubit Astrit Gjyrezi dhe drejtori sportiv Eugent Zeka kanë takuar stafin teknik dhe futbollistët duke i pyetur për gjendjen, problemet shëndetësore të atyre që kanë patur të tilla por edhe për klimën që ekziston në rradhët e tyre. Ai që ka folur më shumë ka qenë administratori i cili ndër të tjera u ka garantuar sërish mbështetje maksimale futbollistëve dhe përpos kësaj, ka kërkuar nga ato një përkushtim ashtu si duhet për t’i kaluar me sukses të gjitha ndeshjet, duke nisur nga ajo e para e këtij viti, përballja me Kukësin. Pas administratorit, kanë folur edhe kapiteni Shtubina, Tafili dhe pjestarë të stafit teknik të cilët kanë siguruar se gjendja e ekipit është e mirë dhe do të merret maksimumi në secilin takim. Disa nga lojtarët që kanë patur probleme shëndetësore, duken në rrugën e duhur të rikuperimit dhe pritet që të jenë të gatshëm për takimin e së premtes dhe ky është një tjetër lajm i mirë për kuqeblutë. Kësisoj, atmosfera duket shumë pozitive dhe kjo është ajo çfarë ka rëndësi në prag të sfidës së parë të këtij viti. Kjo është diçka e cila duhet vlerësuar por gjithsesi tashmë duhet parë reagimi i skuadrës në ndeshjen e së premtes.
© shkodrasport.com
