Mesfushori Cristian Dros ka dhënë së fundi një intervistë për mediat e vendit të tij teksa ka folur për Elbasanin e cila do të ndeshet me skuadrën moldave Petrocub në turin e parë të “Conference League”. Njëkohësisht ai ka folur edhe për arsyen e rinovimit të kontratës me Vllazninë edhe për sezonin e ri.
Njëkohësisht ka folur edhe për shortin e Vllaznisë dhe dy përballjet e turit të parë me Malishevën teksa ka shprehur bindjen se mundësitë janë për ta kaluar këtë kundërshtar.
Shorti ju vuri përballë Malishevën e Kosovës. Si e vlerësoni këtë kundërshtar? Ndoshta do të kishit preferuar një emër më të madh?
Është një kundërshtar i mirë, por mendoj se është brenda mundësive tona. Objektivi ynë është kalimi në turin tjetër. Natyrisht, çdo futbollist dëshiron të luajë kundër skuadrave më të forta për të testuar nivelin e tij, por fillimisht duhet të fitosh ndaj ekipeve si Malisheva. Duhet të përgatitemi shumë mirë, sepse na pret një ndeshje e vështirë. Sa më shumë t’i afrohemi takimit, aq më shumë do ta analizojmë kundërshtarin për të kuptuar stilin e lojës së tij. Nga ana jonë, do të përpiqemi të imponojmë lojën tonë dhe të tregojmë se jemi skuadra më e fortë.
Fakti që kundërshtari vjen nga një vend fqinj është avantazh apo disavantazh?
Sigurisht që është një avantazh për ne, sepse nuk do të shpenzojmë shumë kohë dhe energji në udhëtim. Megjithatë, kjo nuk na jep ndonjë përparësi reale, pasi edhe kundërshtari ndodhet në të njëjtën situatë. Në këtë fazë nuk kemi menduar shumë për origjinën e kundërshtarit apo për destinacione ekzotike. Për ne ka rëndësi niveli i ekipit dhe gjendja në të cilën do të ndodhet në momentin e ndeshjes. Malisheva zhvilloi ndeshjen e fundit të kampionatit më 31 maj, ashtu si ne, ndaj në aspektin e përgatitjeve do të jemi në kushte të barabarta.
Në fillim të muajit rinovuat kontratën me Vllazninë. Çfarë ju shtyu të vazhdoni?
Sezonin e ardhshëm do të vazhdoj të luaj për Vllazninë, sepse klubi aktivizoi opsionin në kontratë dhe e zgjati atë edhe për një vit. Kampionati shqiptar është një kampionat i mirë, me nivel të lartë si të futbollistëve të huaj, ashtu edhe të lojtarëve vendas. Ndjej se ende mund të rritem si futbollist këtu. Sezoni i kaluar nuk ishte shumë i suksesshëm për mua, sepse pësova një dëmtim dhe humba pothuajse gjysmën e kampionatit. Shpresoj që këtë vit gjithçka të shkojë më mirë dhe që pas një sezoni të kem mundësinë të bëj një hap përpara në karrierën time.
