Sfida e sotme Vllaznia-Kastrioti, e vlefshme për javën e 16-të të Kategorisë Superiore ka qenë një betejë e vërtetë nervash dhe emocionesh.
Në disa momente të sfidës, lojtarët e të dyja skuadrave u përplasën me njëri-tjetrin, ndërsa nuk munguan as pakënaqësitë për arbitrimin.
Terreni i rënduar i “Loro Boriçit” prej shiut shtoi akoma më shumë ngarkesën psikologjike te skuadrat, madje edhe te pankinat.
Trajneri i Kastrioti, Ramadan Ndreu qëndroi thuajse gjatë gjithë ndeshjes në këmbë duke sfiduar shiun e rrëmbyer. Tekniku krutan e ka përjetuar fort lojën si dhe vendimet e gjyqtarit.
Megjithatë, ai u largua i kënaqur nga Shkodra, pasi arriti të frenonte kryesuesit e kampionatit në barazim 0-0.
