Kategoria e Parë e Kampionatit Kombëtar të Futbollit luan përgjatë 3 ditëve të ardhshme 7 sfidat e javës së 3-të të saj, duke ofruar një numër përballjesh interesante. Një prej takimeve të spikatura është ai midis Lushnjës dhe Besëlidhjes dhe kjo është edhe sfida që do të vijë drejtpërdrejt në Rrjetin e Radio-Televizionit Shqiptar, duke nisur nga ora 16:00.
Ndërkohë që lezhjanët vijnë në këtë duel të javës së 3-të pas një fitoreje dhe një barazimi në dy ndeshjet e para, myzeqarët vijnë pas një humbjeje të pësuar në ndeshjen e vetme të luajtur deri më tani teksa ndeshja e tyre në javën e parë ishte shtyrë për shkak të problemeve me fushën e stadiumit.
Ndërkaq, përveç kësaj ndeshjeje, të shtunën luhen edhe 3 takimet të tjera, që nisin në ora 15:00 dhe Korabi pret Luzin 2008, Flamurtari viziton Cërrikun për t’u ndeshur me Turbinën, ndërsa Tomori është mysafir në Pukë, për t’u ndeshur me Tërbunin. Ndërkaq, të dielën luhen dy takime të tjera, edhe ato duke nisur nga ora 15:00, dhe Dinamo pret Burrelin, ndërsa Oriku pret Skënderbeun.
Java e 3-të e Kategorisë së Parë mbyllet të hënën, me takimin midis Besës dhe Apolonisë, që gjithashtu luhet duke nisur nga ora 15:00. Apolonia, Dinamo, Luzi 2008, Besëlidhja dhe Tomori ndajnë kreun e renditjes pas dy javëve të para, me nga 4 pikë secila.
Kategoria e Parë
Java e 3-të
17/09/2022
15:00 Korabi – Luzi 2008
15:00 Turbina Cërrik – Flamurtari
15:00 Tërbuni Pukë – Tomori
16:00 Lushnja – Besëlidhja
18/09/2022
15:00 Dinamo – Burreli
15:00 Oriku – Skënderbeu
19/09/2022
15:00 Besa Kavajë – Apolonia Fier
