Ditën e sotme u zyrtarizua “divorci” i trajnerit Sylvinho me kombëtaren shqiptare. Pas tre vitesh e gjysëm në krye të saj, braziliani tashmë i ka lënë vendin italianit Rolando Maran. Megjithatë “epoka” Sylvinho nuk do të harrohet lehtë nga kuqezinjtë.
Njëri prej tyre, pikërisht Mario Mitaj, i cili nën drejtimin e brazilianit njohu shkëlqimin me fanellën kuqezi, sot i ka dhënë një mesazh shumë domethënës lamtumire ku përmes një postimi në instastory shkruan:
“Faleminderit për gjithçka Mister, gjithë të mirat në të ardhmen”- shkruan mbrojtësi i majtë i kombëtares shqiptare duke e shoqëruar këtë tekst me një foto ku është bashkë me trajnerin e larguar tashmë.
Në fakt Sylvinho do të mbahet mend gjatë si trajneri që “zbuloi” dy emra për kombëtaren shqiptare: Mario Mitaj dhe Jasir Asani. Dhe të dy ata i janë shumë mirënjohës për këtë gjë.
Burimi: Gazeta “Shkodra Sport”
