Ka startuar dje pasdite në Shkodër Memoriali ndërkombëtar i boksit “Vllaznia 2012”. Aktiviteti më i rëndësishëm i këtij sporti, nga viti në vit njeh arritje të tjera teksa shtohet numri i ekipeve pjesmarrëse, shtohet cilësia e boksierëve pjesmarrës dhe prania në edicionin e sivjetëm e boksierëve që janë kampion olimpik, kampion bote, kampion Europe dhe kampion Afrike, ia ka rritur edhe interesin me të cilin ai shihet nga pjesmarrësit. Në momentet e fundit, nuk kanë mundur të sigurojnë biletat e ardhjes në Shqipëri, tre ekipe afrikani pikërisht Nigeria, Gambia dhe Sri Lanka, e për rrjedhojë numri i ekipeve pjesmarrëse në Memorialin “Vllaznia 2012” tashmë është 11. Aktiviteti ka nisur me rreshtimin e ekipeve pjesmarrëse, të cilat i ka përshëndetur në emër të organizatorëve pikërisht shefi i klubit Vllaznia Gëzim Mema. Pas kësaj ceremonie, kanë nisur ndeshjet që kanë dhuruar emocione.në fakt, emocionet më të mëdha kanë qenë në ndeshjen e peshës 64 kg kur boksieri i Vllaznisë Kristian Shytani ka bërë një ndeshje shumë të bukur ndaj bullgarit Hristov duke ngritur në këmbë gjithë pallatin e sportit “Qazim Dervishi” dhe në fund sigurisht që janë lumtuar kur ai është shpallur fitues.Por Shytani ka qenë i pari nga boksierët tanë që ka fituar.Pas tij rradhën e ka patur Asmer Bilali që ndonëse ka patur përballë një boksier shumë të fortë si nënkampioni i Kazakistanit Kozhabekov por ka fituar me meritë ndaj tij. Kjo ndeshje ka qenë shumë interesante, e shoqëruar me një rivalitet shumë të madh. Pas Bilalit, suksesin tjetër për tanët e ka arritur tiranasi Bermeta perballë egjiptianit Hikal, për të vazhduar me një tjetër sukses në peshë 75 kg, me boksierin e Vllaznisë Bekim Vjerdha, ndërkohë që nga tanët, i fundit që ka dalë në ring ka qenë Kristian Demaj. Përballë egjiptianit Elalfy, shkodrani ka bërë një ndeshje shumë të mirë duke e detyruar kundërshtarin e tij të tërhiqet pas raundit të dytë. Në këtë mënyrë dita e parë e Memorialit “Vllaznia 2012” është mbyllur mirë për kombëtaren shqiptare teksa nga 7 ballafaqimet e sportistëve të saj, kanë dalë fitues 5 prej tyre. Kanë humbur dy boksierët e rinj Ronildo Piranej dhe Kristian Matija, megjithatë rivaliteti në këtë aktivitet ka qenë shumë i madh në çdo ndeshje dhe çdo peshë.Të pranishëm për të ndjekur ndeshjet e ditës së parë, kanë qenë deputetët e Shkodrës Gjokë Uldedaj dhe Ramiz Çoba, por ka rënë në sy edhe mundësi shkodran, kampion bote me Bullgarisë Elis Guri. në fund të ditës së parë, trajneri i kombëtares shqiptare Zef Gjoni është shprehur i kënaqur me mënyrën si kanë shkuar gjërat. “Mendoj se ia arritëm qëllimit të fitojmë ndeshjet tona kryesore. Sidomos do veçoj fitoren e Bilalit përballë një prej boksierëve më të mirë të Kazakistanit, këtij vendi me boks shumë të zhvilluar. Po ashtu, edhe fitorja e Demës ishte shumë e veçantë sespe e detyroi kundërshtarin e tij të tërhiqet. Po kaq të bukura kanë qenë edhe fitoret e Shytanit, Bermetës dhe Vjerdhës megjithatë vëmendjen më të madhe e kam deklaruar që e kam tek Bilali dhe Demaj tek të cilët kam shumë shpresa për të zënë vendin e parë dhe për të marrë medaljet e arta në këtë aktivitet. Për ne është shumë kënaqësi zhvillimi i një aktiviteti të tillë me përmasa të jashtëzakonshme për sportin shqiptar. Nuk është pak të vijnë në Shkodër, kampionë olimpikë, kampionë bote, kampion Europe, kjo tregon cilësinë e lartë të boksierëve pjesmarrësve dhe treguesi më i mirë për këtë janë mbyllja e ndeshjeve vetëm me pikë duke mos patur asnjë nokaut. Kemi patur jo pak stres përpara Memorialit për anën financiare por tifozët që vijnë në pallatin e sportit tani nuk duan t’ia dinë për këto gjëra. Duan të shohin boks, megjithatë ua shpërblyem me fitore dhe ndeshje të bukura. Pallati i sportit sonte ka patur shumë tifozë dhe në dy ditët e ardhshme mendoj se do ketë ehde më shumë”-ka thënë ai.