Shkruar nga Endri ÇINARI
Bekim Balaj po kalon një periudhë jo fort pozitive përpara portës kundërshtare, me kapitenin e Vllaznisë që prej disa javësh nuk po arrin të gjejë rrugën e rrjetës. Sulmuesi kuqeblu e nisi sezonin në mënyrën më të mirë të mundshme, duke realizuar dy gola në duelin debutues të kampionatit ndaj Skënderbeut, të përfunduar në barazimin 2-2. Megjithatë, ajo që dukej si një nisje premtuese, është pasuar nga një seri ndeshjesh pa gola për 35-vjeçarin.
Që prej asaj sfide ndaj korçarëve, Balaj nuk ka shënuar në gjashtë ndeshje radhazi, duke mos arritur të lërë gjurmë në tabelën e golashënuesve. Një statistikë që bie në sy, sidomos kur bëhet fjalë për një futbollist me eksperiencën dhe peshën e tij në skuadrën shkodrane. Kapiteni kuqeblu ka regjistruar plot 520 minuta lojë pa gjetur rrjetën, një shifër që tregon qartë vështirësitë e tij për të qenë vendimtar në javët e fundit.
Mungesa e golave nga ana e Balajt nuk mund të shihet e shkëputur edhe nga problemet që Vllaznia ka shfaqur në këtë fazë të kampionatit. Shkodranët kanë vuajtur për të ruajtur vazhdimësinë në rezultate, ndërsa kontributi i kapitenit në fazën sulmuese mbetet një element i rëndësishëm për objektivat e skuadrës. Në një moment kur kuqeblutë kanë nevojë për më shumë efikasitet përpara portës, rikthimi te goli i sulmuesit kryesor do të ishte një ndihmë e madhe për ekipin.
Për Balajn, kjo është një periudhë që kërkon autokritikë dhe reagim në fushën e lojës. Përvoja e gjatë në futbollin shqiptar dhe aftësia për të qenë vendimtar e bëjnë atë një prej pikave ku Vllaznia mbështet shpresat për të dalë nga vështirësitë. Në një kampionat ku çdo gol mund të ketë peshë të veçantë, kapiteni duhet të rikthejë instinktin e tij prej golashënuesi dhe të marrë sërish përgjegjësitë që i takojnë liderit të skuadrës.
Dhe çfarë rasti më të mirë sesa përballja e së shtunës ndaj Tiranës? Një kundërshtar që Balaj e njeh mirë dhe ndaj të cilit ka spikatur në sezonet e fundit, duke u kthyer në një emër shqetësues për mbrojtjen bardheblu. Sulmuesi shkodran ka ndërtuar një raport pozitiv me golin në sfidat ndaj kryeqytetasve, çka e bën këtë përballje një mundësi të veçantë për të ndërprerë serinë negative.
Në kampin kuqeblu shpresojnë që dueli klasik me Tiranën të shërbejë si pikë kthese edhe për kapitenin e tyre. Një gol i Balajt do të kishte vlerë jo vetëm për statistikat personale, por edhe për moralin e një skuadre që kërkon të rikthehet te rezultatet pozitive. Për ish-sulmuesin e kombëtares, sfida e së shtunës mund të jetë momenti ideal për të thyer heshtjen dhe për të dëshmuar edhe një herë se mbetet një nga armët kryesore të Vllaznisë në repartin ofensiv.
