Shkruar nga Endri ÇINARi
Te Vllaznia duket se nuk e kanë mbyllur ende punën në këtë merkato vere. Përkundrazi, drejtuesit kuqeblu vijojnë të punojnë intensivisht për të kompletuar skuadrën dhe, sipas asaj që mësohet, janë shumë pranë finalizimit të dy afrimeve të rëndësishme që pritet t’i japin një tjetër fytyrë ekipit të Edi Martinit.
Burime pranë klubit bëjnë me dije për gazetën se bëhet fjalë për një portier dhe një mbrojtës të një niveli të lartë, futbollistë me eksperiencë dhe cilësi, të cilët pritet të rrisin ndjeshëm konkurrencën në formacion. Edhe pse identiteti i tyre mbahet ende sekret, negociatat kanë hyrë në fazën përfundimtare dhe optimizmi për mbylljen me sukses të marrëveshjeve është i madh.
Drejtuesit e Vllaznisë kanë preferuar të ruajnë konfidencialitetin deri në momentin e firmës, për të shmangur ndërhyrje të mundshme nga klube të tjera. Megjithatë, burimet konfirmojnë se kontaktet mes palëve kanë avancuar ndjeshëm dhe, nëse nuk do të ketë surpriza të minutës së fundit, zyrtarizimi i të dy lojtarëve mund të vijë shumë shpejt.
Pas ndryshimeve të shumta të bëra gjatë kësaj vere, kuqeblutë synojnë të kompletojnë repartet që kanë nevojë për më shumë garanci. Porta dhe mbrojtja konsiderohen dy sektorë ku stafi teknik ka kërkuar përforcime cilësore, ndaj këto afrime pritet të kenë një peshë të madhe në projektin e sezonit të ri.
Tashmë mbetet vetëm çështje kohe që Vllaznia të hedhë hapin e radhës në merkato. Nëse gjithçka do të shkojë sipas planit, tifozët kuqeblu mund të presin shumë shpejt prezantimin e dy emrave që pritet të jenë ndër goditjet më të rëndësishme të kësaj vere për klubin shkodran.
Burimi: Gazeta “SHKODRA SPORT”
