Pasditën e djeshme, Pogradeci, që siç dihet këtë sezon po drejtohet nga trajneri shkodran Samuel Nikaj, ka arritur të marrë një tjetër fitore në javën e tretë të kampionatit të Kategorisë së Parë.
Liqenorët kanë zhvilluar një lojë të mirë dhe kanë fituar me rezultatin minimal 0-1 në derbin ndaj Maliqit. Golin e fitores e ka shënuar mesfushori korçar Klejdi Rapo, në pjesën e parë, më konkretisht në minutën e 20-të.
Kjo ka qenë fitorja e dytë e Nikajt në krye të kësaj skuadre në tre ndeshje të luajtura deri më tani dhe duket se gjithçka po ecën mbarë për trajnerin shkodran në Kategorinë e Dytë. Në fakt, përballë ishte Maliqi, ekip që u mundua të tregojë vlerat e saj më të mira në fushën e lojës, ç’ka ia vështirësoi disi punën Pogradecit, por në fund ndeshjen e ka fituar ekipi i trajnerit shkodran Nikaj.
Tashmë, pas kësaj fitoreje, Pogradeci kryeson tabelën e renditjes me shtatë pikë. Kështu, liqenorët po tregojnë se do të jenë pretendentët kryesorë për ngjitjen në Kategorinë e Parë gjatë sezonit që vjen.
Mënyra se si është ndërtuar Pogradeci i këtij sezoni tregon se objektivat janë shumë serioze dhe ngjitja një kategori më lart është detyrë për futbollistët që e përbëjnë këtë skuadër, si edhe për trajnerin shkodran Nikaj.
Ky do të ishte ekipi i katërt me të njëjtin sukses nën drejtimin e Samuel Nikajt pas Flamurtarit të Prishtinës, Kastriotit të Krujës dhe Vushtrisë.
Maringlen ZHIVANI
