Xhudistët shkodranë të Vllaznisë dhe Vau Dejësit kanë bërë një paraqitje të shkëlqyer në turneun ndërkombëtare “Judo Cup Drobeta” të zhvilluar sot në Rumani. Ata kanë arritur të marrin 3 medalje, dy argjendi dhe një bronzi ndonëse pjesmarrës kanë qenë rreth 1 mijë sportistë nga Mali i Zi, Rusia, Bosnja, Shqipëria, Rumania, Bullgaria, Maqedonia dhe Serbia. Kështu, Lurian Kaçi ka konkurruar në peshën 66 kg dhe ka arritur të zërë vendin e dytë pas 2 ndeshjeve të fituar dhe vetëm ndeshjes finale të humbur pas një faulle të dhënë nga ana e gjyqtarit.
Po ashtu edhe Luigj Shkoza ka arritur të zërë vendin e dytë në peshën 73 kg me 4 ndeshje të fituara dhe vetëm me finalen të humbur. Juli Marku ndërkohë në peshën 81 kg ka zënë vendin e tretë me tre ndeshje të fituara dhe vetëm një të humbur ndërsa Damian Çuni ka zënë vendin e pestë në peshën 46 kg. Këto janë rezultate të shkëlqyera të këtyre sportistëve kuptohet me një pjesmarrje kaq të madhe sportistësh. Trajneri Anton Shkoza duket mëse i kënaqur me këto arritje. Në këtë turne, xhudistët shkodranë kanë qenë të shoqëruar nga Ferdinand Jaku i cili përveçse drejtues i ekipit të futbollit të femrave Juban Danja, është edhe një pasionant i sportit të xhudos teksa i ndjek këta sportistë jo vetëm në aktivitetet kombëtare por edhe ato ndërkombëtare.
Gjergj KOLA
