Shkruar nga Maringlen ZHIVANI
Qendërmbrojtësi Elmando Gjini është rikthyer te Ballkani, pas përfundimit të huazimit njëvjeçar te Vllaznia. Mbrojtësi 23-vjeçar i është bashkuar skuadrës suharekase në fazën përgatitore që po zhvillohet në Bansko të Bullgarisë, duke nisur kështu përgatitjet për sezonin e ri.
Gjini ishte pjesë e Vllaznisë gjatë sezonit të kaluar, ku u aktivizua rregullisht në qendër të mbrojtjes dhe dha kontributin e tij në rrugëtimin e kuqebluve. Me përfundimin e marrëveshjes së huazimit, ai rikthehet te Ballkani, klub me të cilin ka kontratë.
Tashmë mbetet për t’u parë nëse mbrojtësi do të jetë pjesë e planeve të trajnerit për sezonin e ri, apo nëse Ballkani do të vendosë ta huazojë sërish për t’i garantuar më shumë minuta.
Rikthimi i tij i shton alternativat në repartin difensiv të kosovarëve, të cilët synojnë një tjetër sezon të suksesshëm në garat vendase dhe ato europiane.
Burimi: Gazeta “Shkodra Sport”
