Ekipi i volejbollit të femrave të Vllaznisë ka bërë një gabim jo të vogël në ndeshjen e luajtur pasditen e sotme ndaj Partizanit. Takimi i luajtur në “Qazim Dervishi” ka filluar mbarë për vajzat shkodrane të cilat kanë fituar setin e parë me rezultatin 25-23. Ky set i parë i fituar dha përshtypjen se ato do ta fitonin këtë ndeshje për më tepër që edhe në setin e dytë ata udhëhiqnin deri në 15-11. Pikërisht në ato momente, vajzat e trajneres Sadije Gogaj kanë gabuar në dy- tre momente duke kaluar edhe në nervozizëm dhe për rrjedhojë e kanë humbur këtë set me shifrat 21-25.
Barazimi i tyre demoralizon Vllazninë dhe u jep zemër vajzave të Partizanit që fitojnë lehtësisht setin e tretë 25-12 dhe po ashtu edhe të katërtin dhe të fundit 25-15 duke marrë krejt ndeshjen me rezultatin 3-1. Pas ndeshjes, trajneria Gogaj dhe vajzat e ekipit të Vllaznisë janë parë tejet të dëshpëruara për këtë humbje kur kishin mundësi të merrnin edhe fitoren dhe të ngjiteshin në vendin e gjashtë në renditje.Megjithatë është një mësim për ndeshjet e ardhshme për të mos nënvlerësuar për asnjë moment kundërshtarin.
www.shkodrasport.com
