Shkruar nga Endri ÇINARI
Vllaznia hyn në një nga momentet më vendimtare të sezonit, me gjithë fokusin e përqendruar te gjysmëfinalja e kthimit të Kupës së Shqipërisë ndaj Dinamos. Pas barazimit 1-1 në sfidën e parë të luajtur në Tiranë, gjithçka mbetet e hapur për duelin e kthimit në “Loro Boriçi”, aty ku shkodranët do të kërkojnë të shfrytëzojnë faktorin fushë dhe mbështetjen e tifozërisë për të prerë një biletë drejt finales.
Edhe pse në kampionat erdhi një gjysmë hapi fals me barazimin 0-0 ndaj Vorës, kjo nuk duket se ka ndikuar negativisht në moralin e skuadrës. Përkundrazi, ambienti në radhët e kuqebluve paraqitet i qetë dhe i përqendruar, me të gjithë energjinë e kanalizuar te sfida e Kupës, e cila shihet si një objektiv konkret dhe plotësisht i arritshëm.
Stafi teknik ka bërë të qartë se nuk ka vend për shpërqendrim në këtë fazë të sezonit. Menjëherë pas ndeshjes së kampionatit, skuadra është rikthyer në punë, duke zhvilluar edhe të dielën një seancë stërvitore të karakterit rikuperues. Ky detaj tregon seriozitetin maksimal me të cilin po përgatitet kjo përballje, ku çdo element fizik dhe taktik konsiderohet vendimtar.
Nga ana tjetër, grupi duket i bashkuar dhe i vetëdijshëm për rëndësinë e këtij takimi. Lojtarët kanë lënë pas çdo rezultat të fundit në kampionat dhe janë të fokusuar vetëm te përballja me Dinamon, ku pritet një duel i fortë dhe i luftuar deri në minutën e fundit. Barazimi i parë ka rritur ndjeshëm tensionin sportiv, por edhe motivimin për të dhënë maksimumin në fushë.
Në Shkodër besohet fort se Kupa mund të jetë rruga tjetër drejt suksesit këtë sezon. Me një grup të përqendruar, një staf teknik të vendosur dhe një qytet që jeton për futbollin, Vllaznia synon të bëjë hapin e madh drejt finales, duke konfirmuar se mbetet një nga pretendentët kryesorë për trofeun.
Burimi: Gazeta “Shkodra Sport”
