Titulli i La Liga-s është shumë i vështirë për Barçën jo vetëm për shkak të 8 pikëve larg kreut, që mbahet nga Real Madridi, por edhe më shumë për shkak të ndjenjave. Mundësitë e humbura si ajo në ‘San Mamés’ zbulojnë një skuadër që, sikur të mos mjaftonte, rëndohet nga dëmtimet.
Ato të Frenkie de Jong dhe Pedri janë veçanërisht dëmtime të rëndësishme. Holandezi po tregonte një nivel më se të pranueshëm, por mbi të gjitha djaloshi nga Tenerife nuk kishte arritur të jetë kurrë njësoj si sezonin e kaluar. Barça është kampione aktuale e La Liga-s sidomos për raportin dhe forcën që arriti të kishte në mesfushën e saj.
Busquets dhe Frenkie në bazën e rombit të mesfushës, me Pedri dhe Gavi në krye të kësaj forme gjeometrike që i dha rezultate kaq të mira Xavit, formuan një bërthamë me shumë futboll dhe talent. As ardhja e Ilkay Gündogan nuk ka mundur të ruajë nivelin, kryesisht sepse ‘Busi’ është i pazëvendësueshëm (Oriol Romeu nuk ka arritur të imponohet), Gavi u dëmtua shumë shpejt dhe Pedri nuk ia ka dalë, për shkak të dëmtimeve të mallkuara.
Ishte një mesfushor i pestë sezonin e kaluar, i cili, kur duhej, kontribuoi në gjëra të ndryshme. Mbi të gjitha shumë muskuj. Ishte Franck Kessié. Ai mori pjesë pothuajse në të gjitha ndeshjet (43) dhe do të kujtohet gjithmonë për golin që shënoi në “Camp Nou” në momentin e fundit të klasikes (fitoren 2-1).
Pjesëmarrje të mirë pati edhe Sergi Roberto. Kapiteni nuk i ka shpëtuar dot as këtë sezon dramës së lëndimeve. Xavi është i detyruar të kërkojë zgjidhje në ndeshjet e ardhshme pa tre pjesë aq të rëndësishme si Gavi, Pedri dhe Frenkie. Ilkay Gündogan do të bëhet lideri i padiskutueshëm i mesfushës. Turko-gjermani duhet të bëjë një hap përpara, për shkak të përvojës dhe peshës specifike.
Ka ardhur koha edhe për Sergi Roberton, i diskutuar shpesh nga ata që e rrethojnë, por të cilin Xavi e ka vlerësuar gjithmonë. Po kështu, do të jetë shumë e rëndësishme t’i jepet Fermín më shumë hapësirë dhe të rikuperohet versioni më i mirë i Oriol Romeu. Në fillim të sezonit, lojtari nga Ulldecona tregoi ndjenja shumë të mira dhe aftësi për të qenë strumbullari mbrojtës i skuadrës. Barça ka nevojë për të./telesport/
