BASKETBOLL

Federata Shqiptare e Basketbollit më në fund e ka përcaktuar skemën me të cilën do zhvillohet sivjet Kupa e Shqipërisë. Megjithëse mendohej të kishte një pjesmarrje të gjërë, në fund është rënë dakord që në finalet e këtij kompeticioni të marrin pjesë vetëm katër skuadrat e renditura në katër vendet e para në gjysmën e parë të kampionatit. Kjo e njëjta gjë, si për meshkuj ashtu edhe për femra. Vllaznia për femra është më poshtë në renditje pra nuk do marrë pjesë në këtë kompeticion, ndërsa ekipi i meshkujve po. Madje edhe formula e ndeshjeve është e përcaktuar teksa skuadra e vendit të parë luan me atë të vendit të katërt dhe e dyta me të tretën.

Federata Shqiptare e Basketbollit ka mbledhur dje pasdite kryesinë e re të saj e cila që në mbledhjen e parë ka caktuar edhe datat se kur do të nisin kampionatet kombëtare. Kështu është vendosur që ato të startojnë më 27 tetor, si për meshkuj edhe për femra. Sigurisht që një datë e tillë është paksa e vonuar sepse zakonisht këto kampionate kanë startuar gjatë shtatorit megjithatë tashmë trajnerët duhet të marrin masat për t'u bërë gati për këto kampionate.

Vllaznia në basketboll për meshkuj ka fituar edhe ndeshjen e dytë finale të kampionatit ndaj Tiranës dhe tashmë është shumë pranë shpalljes kampione e vendit për këtë sezon. Ky takim është luajtur pasditen e së premtes në pallatin e sportit “Qazim Dervishi” që ka qenë sërish I tejmbushur me sportdashës.

Ndodh edhe kështu në sportin shqiptar. Basketbollisti i Tiranës Erkand Karaj që vetëm pak ditë më parë u pezullua 6 muaj nga aktiviteti bashkë me trajnerin e Vllaznisë Bledar Gjeçaj, për shkak të incidentit që kanë patur mes tyre, është aktivizuar mbrëmë në ndeshjen e Ligës Ballkanike që bardheblutë kanë zhvilluar në Kosovë ndaj Trepçes. Ai madje ka qenë i rëndësishëm për ekipin e tij duke shënuar edhe 15 pikë. Por ky aktivizim është diçka absurd sepse vjen pikërisht në një moment kur atij sapo i kishte nisur dënimi i dhënë nga Komisioni i Disiplinës pranë FSHB-së.