BOKS

Mbledhja e fundit e kryesisë së Federatës Shqiptare të Boksit e zhvilluar pak ditë më parë është shoqëruar nga një debat i fortë në mes anëtarëve të kryesisë dhe presidentit të saj Gjergj Leqejza. Ajo ka patur në rendin e ditës ndarjen e grantit të ardhur nga Ministria për vitin 2015 por me t’u hapur mbledhja, shumica e anëtarëve të kryesisë i kanë dorëzuar presidentit një peticion për largimin e tij. Një lajm i tillë në fakt ka kaluar në heshtje deri ditën e djeshme kur ka qenë trajneri i Vllaznisë Zef Gjoni që në një konferencë për shtyp, ka shpjeguar gjithçka po ndodh në boksin shqiptar.

Në muajin qershor të këtij viti, për herë të parë në histori, do të zhvillohen Lojërat Europiane. Një aktivitet shumë i rëndësishëm ku do të marrin pjesë sportistët më të mirë të të gjitha vendeve të Europës dhe në të gjitha llojet e sporteve. Këto Lojëra do të zhvillohen në qytetin Baku të Azerbajxhanit. Në to, do të marrë pjesë edhe Shqipëria dhe Komiteti Olimpik ka nisur përgatitjet për të përzgjedhur sportistët që do ta përfaqësojnë vendin tonë në këtë aktivitet shumë të rëndësishëm.

Vllaznia në boks është shpallur fituese fituese e Kupës së Republikës për vitin 2014. Në ndeshjet finale të zhvilluara pasditen e sotme, kanë dominuar boksierët shkodranë në pesë pesha e pikërisht Vuksan Guri, Ronildo Piranej, Emanuel Kaçaj, Kristian Demaj dhe Nelson Hysa. Fitorja e këtij trofeu ka qenë e 20-ta për ekipin e Vllaznisë në 23 edicionet e Kupës që janë zhvilluar në vendin tonë pas viteve ’90. Emocione për këtë trofe të fituar ka patur edhe trajneri I Vllaznisë Zef Gjoni kur është shprehur se ky triumf tregoi edhe njëherë tjetër se kush është Vllaznia dhe kush është boksi shkodran.

Presidenti aktual i Federatës Shqiptare të Boksit Gjergj Leqejza ka mohuar që në institucionin që ai drejton të ketë mbërritur një peticion i firmosur nga përfaqësues të disa klubeve dhe shoqatave të vendit që kërkojnë shkarkimin e tij. Ai madje, ka dashur ta injoruar një histori të tillë peticionesh duke shprehur bindjen e plotë se nuk ka ndër mend as të dorëhiqet nga ky pozicion dhe po ashtu, as nuk do ketë Asamble të Jashtëzakonshme Zgjedhore në këto momente siç kërkojnë kundërshtarët e tij.

Kombëtarja shqiptare e boksit do të niset sot drejt Kosovës për të marrë pjesë në turneun ndërkombëtar “Adem Jashari”. Ky turne i përvitshëm do të zhvillohet për dy ditë me rradhë, nesër dhe pasnesër në pallatin e sportit të qytetit të Gjakovës. Në të do të marrin pjesë boksierë nga 9 vende dhe pikërisht nga Italia, Mali i Zi, Maqedonia, Kroacia, Bullgaria, Shqipëria, Sllovenia, Hungaria dhe Kosova.

Qyteti sportdashës i Shkodrës do të presë finalet e Kupës së Shqipërisë në boks për këtë vit. Kjo gjë është vendosur në mbledhjen e kryesisë së kësaj Federate dhe tashmë klubi Vllaznia ka filluar të marrë masat për mikëpritjen e të gjithë ekipeve të vendit dhe njëkohësisht edhe për mbarëvajtjen e aktivitetit. Janë përcaktuar edhe datat kur do të zhvillohet ky edicion i Kupës së Shqipërisë teksa dita e parë do të zhvillohet më datë 3 dhjetor ndërsa finalet do zhvillohen më datë 5 dhjetor në pallatin e sportit “Qazim Dervishi”.