SHKODRANET NEPER BOTE

Intrigë nga Amerika. Hamdi Salihi nuk është zyrtarizuar ende si një futbollist i skuadrës kineze, Jiangsu Sainti FC. Edhe pse më datë 4 shkurt uebsajti i këtij klubi, por edhe nga ish-skuadra e tij, DC Junajtid patën lajmëruar arritjen e akordit mes lojtarit dhe klubit klinez gjithçka mbulohet nga një lajm kontradiktor që vjen nga e përditshmja prestigjioze “Uashington post”. Sipas kësaj të fundit Salihi nuk ka firmosur ende, por vazhdon të jetë në tratativa me kinezët. Arsyeja lidhet me shëndetin e sulmuesit. Pasi ka mbërritur në Turqi, Salihi ka bërë vizitat mjekësore, por drejtuesit e klubit kinez nuk janë bindur tërësisht pasi, sipas “Uashington post”, kanë vërejtur probleme në frymëmarrje (në mushkëritë) e shkodranit.

Një prej kampionateve më të ndjekur dhe më të fortë në Evropë, siç është ai i Italisë, mund t’i shtohet shumë shpejt edhe një tjetër futbollist shqiptar. Bëhet fjalë për Elseid Hysajn, i cili pas Canës, Bogdanit, Çanit dhe Ujkanit mund të bëhet legjionari ynë i 5-të në Serinë A.
Mbrojtësi i përfaqësueses sonë, i cili aktivizohet në Serinë B me Empolin, pas paraqitjeve të mira në këtë sezon me klubin ku luan dhe debutimit me Shqipërinë në miqësoren ndaj Gjeorgjisë i ka shtuar shumë kredenciale profilit të tij, duke rënë në sy të shumë skuadrave të njohura.

Nga Amerika në Kinë. Hamdi Salihi ka nisur një aventurë të re te skuadra e Jiangsu Santit. Ka nënshkruar për një vit, me opsion rinovimi edhe për një vit tjetër. Ka shkuar te nënkampionët e Kinës, por gjithsesi mbetet një sakrificë, ndaj edhe zgjedhja e tij ka qenë për të siguruar të ardhmen. “Ndonjëherë njerëzit kujtojnë se ne futbollistët flemë në stadium, por nuk është ashtu. Kemi edhe ne familje dhe duhet të mendojmë për të ardhmen”, – është përgjigja e Salihit kur pyetet se përse nuk zgjodhi një skuadër europiane.

Vetëm 5 vite më parë luante akoma në Shkodër, ndërsa më datë 6 shkurt të këtij viti, Elseid Hysaj debutoi me Kombëtaren, pas një sezoni fantastik me Empolin. 19-vjeçari është lojtari i tretë më i ri që ka luajtur me përfaqësuesen tonë, dhe ky duket se është vetëm fillimi. Në një intervistë për portalin “Asport. Info”, mbrojtësi shkodran shprehet i befasuar dhe ende nuk arrin ta besojë se ka veshur fanellën kuqezi, atë fanellë që ai e ka ëndërruar gjithmonë. Një djalosh shumë i talentuar dhe i dashur, Elsi duket se ka ato cilësi që e bëjnë një njeri të madh, dhe mbase një lojtar të tillë në të ardhmen.

Sulmuesi shkodran Xhevahir Sukaj shënon sërish. E ka bërë këtë gjë edhe në ndeshjen e sotme teksa ka shënuar një gol shumë të rëndësishëm me vlerë trepikësh për Sepahanin. 25 vjeçari ka shënuar në minutën e 81-të të ndeshjes golin e vetëm të saj dhe skuadra e tij ka mundur kësisoj 1-0 ekipin Rah Ahan. Ndeshja në fakt u duk se po shkonte drejt barazimit pa gola por nuk do mendonte kështu Sukaj që 9 minuta para fundit të ndeshjes, ka shënuar një gol me mjaft vlera.

Mbrojtësi shkodran Klodian Semina mund të kalojë në kampionatin kinez të futbollit. Pas Hamdi Salihit që firmosi pak ditë më parë për një nga skuadrat e këtij vendi, tashmë duket se do të jetë rradha e Seminës për ta bërë një gjë të tillë. Lajmi bëhet I ditur nga burime pranë klubit të futbollit Vllaznia, drejtuesit e të cilit dje kanë negociuar me lojtarin për të mos e lejuar të largohet. Por në fakt, mbrojtësi shtatëlartë në kontratën që ka firmosur me klubin shkodran në gushtin e vitit të kaluar, e ka një opsion për largim në rast të ardhjes së një oferte nga jashtë vendit. Dhe skuadra që e kërkon me ngulm duket se është Beijing Guoan. I kontaktuar nga gazeta, këtë lajm e ka pohuar edhe vetë lojtari që ka mbushur pak ditë më parë 24 vjeç.

Elseid Hysaj është emri më i ri në listën e të grumbulluarve nga ana e trajnerit De Biazi për miqësoren me Gjeorgjinë. Vetëm 19 vjeç dhe tashmë ai ka mundësinë për të treguar vlerat e tij me fanellën kuqezi, ku pas paraqitjeve mjaft të mira me Empolin në Serinë B, shkodrani shihet si një nga talentet më të mëdha të futbollit shqiptar.Kështu e ka cilësuar Elseid Hysajn edhe prestigjiozja italiane “Gazzetta dello Sport”, e cila i ka kushtuar vëmendje të veçantë mbrojtësit më të ri të Kombëtares sonë.

Mediat kineze dhe ato amerikane bëjnë me dije se futbollisti i kombëtares shqiptare Hamdi Sali është transferuar nga DC Junajtit në te nënkampionët e Kinës “FC Jiangsu Sainty”. Ishte paralajmëruar prej ditësh se Salihi do të largohej nga Uashingtoni për të nisur një aventure të re në Kinë. Fillimisht u tha se Salihi do të bëhej pjesë e FC Tianjin Teda, skuadër që drejtohet nga ish-trajneri i kombëtares shqiptare, Josip Kuzhe.