Elseid Hysaj do të presë deri në dhjetor për një akord me Napolin për rinovimin, e më pas po mendon të shikojë ofertat e tjera. Mbrojtësi kuqezi nuk e di se çfarë do të bëhet me të në sezonin e ardhshëm.
Me të kaltrit, ai ka kontratë me këtë klub deri në vitin 2021. Hysaj ende nuk ka gjetur gjuhën e përbashkët me drejtuesit napolitanë për rinovimin e kontratës.
Përfaqësuesit e shkodranit duan një kontratë afatgjatë me pagë të dyfishuar, që shkon nga 1.6 në 3 milionë euro neto në sezon si dhe eliminimin e klauzolës 50 milionë euro për jashtë Italisë. Drejtuesit napolitanë këto kërkesa i quajnë të ekzagjeruara.
Hysaj shpreson që gjithçka të mbyllet brenda dhjetorit. Nëse nuk merr një përgjigje, atëherë do të shohë mundësinë e largimit nga Napoli. Chelsea, ku në stol është mentori i tij, Maurizio Sarri, e ka kërkuar edhe verën e kaluar dhe tani është gati të rinisë bisedimet për ta mbyllur një herë e mirë këtë çështje.
