Tirana-Vllaznia u gjykua nga një treshe gjyqtarësh që do të arbitrojnë edhe në grupet e Europës, me kryesor Enea Jorgjin dhe ndihmës të tij, Denis Rexha, dhe Ridiger Çokaj.
Rastet për moviolë nuk munguan në këtë ndeshje, por e përgjithshmja është se gjykimi ishte i drejtë.Momenti kulmor i ndeshjes ishte penalltia në favor të Vllaznisë dhe kartoni i kuq i dhënë ndaj Zhivanajt të Tiranës në minutën e 20-të.
Në këtë rast, arbitrat në fushë dhe në VAR vendosën drejt. Sa për sqarim, ja pse kartoni i kuq për Zhivanajt ishte i drejtë:Mbrojtësi ndërhyn si lojtar i fundit ndaj Kainës, por në këtë rast duket qartë se Zhivanaj nuk kishte asnjë interes për topin, por vetëm për të ndalur sulmuesin e Vllaznisë duke përdorur edhe mbajtjen me dorë.
Kështu që, penalltia dhe kartoni i kuq ishin vendime të sakta të gjyqtarëve.Edhe kartoni i kuq i dhënë për Herald Markun në minutën e 50-të ishte i saktë, pasi ndërhyrja e mesfushorit të Vllaznisë ndaj Deliut ishte e gabuar dhe e meritonte kartonin e dytë verdhë.
Gjatë ndeshjes pati ndonjë moment pandëshkueshmërie për ndërhyrje të gabuar, por gjykimi në këtë rast nuk ndikoi në rezultatin final, madje ishte brenda standardeve.
