Finalja e Ligës së Europës mes Romës dhe Seviljas shkaktoi polemika të shumta sa i përket gjykimit. Italianët ndihen të vjedhur nga arbitri anglez Antoni Tejlor, i cili nuk dha një penallti, e ndërkohë me vendimet e tij shkaktoi pakënaqësi.
Për sjelljen e bërë pas ndeshjes, Zhoze Murinjo rrezikon dënimin shembullor nga UEFA, por nuk mund të thuhet e njëjta gjë për arbitrin. UEFA e ka vlerësuar pozitivisht paraqitjen e Tejlorit, të cilit i ka shkuar edhe ftesa zyrtare nga UEFA për të qenë prezent në finalen Mançester Siti-Inter.
Por, e kundërta ka ndodhur për të katërtin. Për Majkëll Oliver nuk raportohet të ketë një ftesë për në finale, ndërkohë që është qortuar për sjelljen e tij gjatë ndeshjes.
Oliver duhet të kishte njoftuar kryesorin për situatën në kampin verdhekuq dhe për të marrë masa, gjë të cilën i katërti nuk e ka bërë dhe pritet ndëshkimi për të.
