As Danimarka nuk i ka shpëtuar përhapjes së koronavirusit dhe në vendin skandinav është parë e detyrueshmë të ndalet futbolli, ashtu si në pjesën dërrmuese të Europës.

Megjithatë, atje po e mendojnë rikthimin dhe po mundohen të gjejnë një mënyrë që tifozët të jenë sa më afër lojtarëve dhe këta të fundit të ndiejnë emocionet që të jep një ndeshje me tifozë.

Lejimi i tifozëve në stadium është i pamundur për momentin, por skuadra e Midtjëlland e ka në mendje një zgjidhje. Në ndeshjen e radhës ndaj kundërshtarëve direkt të Kopenhagen, organizatorët kanë menduar që tifozët të vijnë pranë stadiumit, por jo të futen brenda.

Madje ata do të jenë të detyruar ta ndjekin ndeshjen brenda makinave të tyre nëpërmjet monitorëve gjigantë, që do të instalohen në ambientet e jashtme të stadiumit.

Gjithashtu ekrane të mëdha do të ketë edhe brenda stadiumit, në mënyrë që lojtarët të shohin dhe dëgjojnë se ç’ndodh jashtë dhe të ndiejnë sadopak atmosferën dhe e emocionet e një ndeshje të madhe.

Ndeshjen pritet ta ndjekin dhjetëra mijëra tifozë. Skuadra e Midtjëlland është shumë pranë titullit, teksa është shkëputur plot 12 pikë nga ndjekësi më i afërt, që është Kopenhagen. /vipsport/