Blutë e Dinamos do të kenë të paktën tri mungesa të sigurta në ndeshjen e radhës me Teutën, që do të luhet të dielën në orën 16:45 në “Elbasan Arena”.
Indrit Prodani dhe Lancinet Sidibe janë të skualifikuar për këtë sfidë, pas kartonëve të marrë ndaj Laçit. Prodani u ndëshkua me të kuq pas përplasjes me arbitrin pas ndeshjes, ndërsa Sidibe plotësoi numrin 4 të kartonëve të verdhë. Më shumë problem është mungesa e Sidibesë, pasi për qendrën e mesfushës alternativat janë më të kufizuara.
I gatshëm është Sabien Lilaj, ndërsa për dy mesfushorët e tjerë stafi teknik duhet të vendosë gjatë javës. Demiri, që ka luajtur në këtë pozicion, u ul në stol ndaj Laçit, ashtu si dhe Ali Samake, që është aktivizuar më parë edhe në qendër të mesfushës, por edhe si mbrojtës i majtë, kështu që ka më shumë shanse të luajë ndaj Teutës.
Një alternativë për mesfushën është edhe Siljanovski. Mungesa tjetër e sigurt është ajo e Aleksandër Isaevskit, i dëmtuar kohë më parë.
