Starti jo i mirë i kampionatit nga ekipi i Besëlidhjes nuk është pritur mirë nga drejtuesit. Ata janë munduar t’ia plotësojnë të gjitha kërkesat lojtarëve dhe stafit teknik por reagimi në fushë në këto dy ndeshjet e para ka qenë zhgënjyes me dy humbje në sfidat ndaj Kukësit dhe Korabit.
Në lidhje me këtë situatë ka reaguar mbrëmjen e sotme përmes një statusi në rrjetet sociale edhe kryebashkiaku Pjerin Ndreu i cili ka thënë se nuk ka vend për dramë, por nga ana tjetër pret reagimin e skuadrës sepse sipas tij objektivi vazhdon të mbetet Superliga. Ja çfarë shkruan ai:
“Dy ndeshjet e para të Besëlidhjes ne futboll, ishin zhgënjyese. Investimit të bërë nuk i është përgjigjur përgjegjshmëria dhe impenjimi që kërkohet në fushë!
Nuk ka vend për dramë, por ka vend për reagim të menjëhershëm! Me Presidentin Fushaj kemi rakorduar masat e nevojshme për ta kthyer ekipin te loja dhe rezultatet që presim.
Objektivi nuk ndryshon: SUPERLIGA! Bashkia Lezhë do të vazhdojë mbështetjen. Tani është radha e ekipit të përgjigjet në fushë dhe me rezultate!”
Burimi: Gazeta “SHKODRA SPORT”
