Matko Djarmatit i ka mbetur peng ndesh ja ndaj AEL Limasolit në Qipro, aty ku, sipas tij, Vllaznia vulosi eliminimin.
Drejtori sportiv i shkodranëve, në një rrëfim ekskluziv për “Panorama Sport”, ka prekur me detaje të gjitha çështjet e nxehta në klubin kuqeblu, duke filluar nga aventura në Ligën e Konferencës, te largimet e disa titullarëve të sezonit të kaluar, por edhe tek ajo që pritet ende nga merkatoja.
Kroati ka theksuar se objektivi maksimal i Vllaznisë në sezonin e ri do të jetë fitimi i titullit kampion. Ai është i bindur se mbrojtësi senegalez, Fallou Dianje, do të jetë një nga lojtarët më cilësorë të kampionatit.
Djarmati zbulon edhe prapaskenat e bisedimeve me mesfushorët Bruno Telushi dhe Gjorgi Stoilov, për të cilët pati ofertë zyrtare nga Vllaznia, por në fund marrëveshjet dështuan.
Janë larguar disa titullarë të sezonit të kaluar, si Marku, Isaevski, Imami, Dilaver etj. Nuk ishin në planet tuaja apo ofertat që klubi u bëri, u refuzuan nga ata?
Isaevski, Imami dhe Marku kanë marrë ofertat nga klubi ynë dhe për mendimin tim, ofertat ishin shumë konkurruese. Marku është lojtar i rritur në akademinë e Partizanit, Imami është rritur në akademinë e Dinamos, por Isaevski edhe sot nuk kuptoj pse është larguar nga Vllaznia. Për Dilaverin kemi menduar se na duhet një lojtar më i ri në pozicionin e vet.
Fakti që lojtarët që ikën kishin kontrata 1-vjeçare dhe nuk ishte totalisht në dorën tuaj t’i mbanit është ky një leksion për të ardhmen për kohëzgjatjen e marrëveshjeve të tjera që do të bëni?
Unë nga dita e parë kur kam ardhur në Shkodër, kam kërkuar kontratat afatgjata, minimumi 2 vjet deri 5- vjeçare, por lojtarët janë shumë skeptikë në vitin e parë, kjo sepse Vllaznia deri këto vite nuk kishte mendimin dhe besim për kontrata 3-vjeçare. Besoj se këto vit kemi më shumë argumente për t’i bindur lojtarët për të firmosur kontrata afatgjata.
Janë afruar 7 lojtarë, ku tre prej tyre, Dianje, Aralica dhe Uellington, nuk mund të ishin në Europë. Ju mendoni se me këto afrime Vllaznia është më e fortë se vjet?
Kryesore është se kemi ruajtur boshtin nga vjet. E kemi studiuar shumë mirë tregun dhe kemi afruar Bulatoviçin dhe Djurdjeviçin, të cilët deri më tani kanë treguar cilësi të mira. Uellington është një lojtar premtues, po presim pas një jave që ta shikojmë në fushën e lojës.
Fallou nëse nuk do të kishte probleme fizike, kurrë nuk do ta kishim parë në Shkodër, por do të ishte në ndonjë kampionat cilësor. Sigurisht ai do të jetë një nga lojtarët më cilësorë. Falë njohjes me trajnerin, ai është lojtar yni sot. Ante Aralica është një lojtar të cilin e kemi kërkuar. Ai do të na sjellë freski në fazën e sulmit. Është një lojtar i ri dhe besoj kemi bërë goditje me këtë lëvizje.
Në bisedat që keni bërë me trajnerin Brdariç, cilat janë pozicionet ku ju do të vazhdoni të bëni patjetër përforcime?
Kemi kërkesa për një mesfushor dhe për një fantazist.
A ka ndonjë emër konkret që mund të na zbuloni se do të afrohet së fundmi?
Për shkak të gjithë interesimit të medias, duhet ta dini se jo çdo emër që del në rrjetet sociale dhe nuk del në faqen zyrtare të klubit, nuk është lojtari ynë. Nuk kam mundësi që në çdo ditë të hedh poshtë informacionet false të cilat qarkullojnë në rrjetet sociale apo në internet. Nga goja ime kurrë nuk do të dalin emra lojtarësh që mund të jenë edhe në negociata.
Si është e vërteta me mesfushorët Telushi dhe Stoilov?
Bruno Telushi kishte ofertën zyrtare nga klubi ynë një javë para fillimit të ndeshjeve të Ligës së Konferencës. Ne kemi menduar se eksperienca e tij do të na ndihmonte për këtë kompeticion europian. Ai nuk ka pranuar ofertën për arsye familjare dhe ne kemi mbyllur në këto moment negociatat me Brunon. Stoilov kishte ofertë zyrtare nga klubi, por ka vendosur të shkojë në një klub tjetër dhe ne nuk do t’ia ndryshojmë mendjen lojtarit. Duhet të kuptoni nuk kemi dëshirë të marrim lojtarët që më parë nuk dinë çfarë është Vllaznia, sepse ai lojtar pastaj në fushë nuk jep maksimumin për Vllazninë.
Synimi i Vllaznisë për sezonin e ri do të jetë titulli kampion?
Vllaznia, nga ardhja e sponsorit të ri, për të cilin shpresojmë që do të jetë edhe pronari i klubit, ka objektivat maksimalë në kampionatin e ardhshëm. Besoj do të jemi konkurrentë në çdo kompeticion: Superkupë, kampionat dhe Kupën e Shqipërisë. Patjetër, objektivi minimal do të jetë kualifikimi në Kupat e Europës.
