Pas suksesit të dy ditëve më parë në Beograd, atleti shkodran Izmir Smajlaj bashkë me trajnerin e tij Vildan Tufi, i janë rikthyer sërish stërvitjes në pistën e betontë të stadiumit “Loro Boriçi”, për t’i dhënë dorën e fundit përgatitjeve për një tjetër sfidë. Madje edhe më të vështirë, asaj të Kampionatit Europian të sallave të mbyllura që do të zhvillohet në datat 3-4 mars po në Beograd të Serbisë. Shpallja kampion i Ballkanit për këtë atlet, natyrisht që ka qenë një arritje jo e vogël, për më tepër me një rezultat të mirë, 7.98 m në garën e kërcimit së gjati ku ai ka garuar. Në një prononcim për “SHKODRA SPORT”, Smajlaj shpreh besimin e tij të plotë se edhe në Europian, do ketë një rezultat të mirë.
“Forma sportive që po kaloj më bën të shpresoj për një paraqitje të mirë edhe në Europian. Të mos harrojmë se në garën e Ballkanikut kemi qenë 20 sportistë në garë, përfaqësues të 16 shteteve sepse tashmë në këto gara po marrin pjesë edhe shtete joballkanike. Në Europian ndërkohë numri i atletëve pjesmarrëse pritet të jetë 30, çka do të thotë se mjafton përsëritja e rezultatit tim dhe unë mund të futem në zonën e medaljeve. Jam i bindur se mund t’ia dal, madje duke kërkuar edhe rezultat më të lartë sepse mundësitë dhe aftësitë i kam. Emocionet që përjetova në garat e para dy ditëve dhe më pas tek ceremonia e ngritjes së flamurit, ka qenë gjëja më e veçantë e jetës time. Kur këndohej himni, më kapën drithmat e emocioneve sepse ishte diçka shumë e bukur. Shpresoj ta përsëris sërish një sukses të tillë”- ka thënë Kampioni i Ballkanit. Edhe trajneri i tij Vildan Tufi është i lumtur për suksesin e parë dhe beson shumë edhe tek vazhdimësia. “Dikush mund të jetë habitur për këtë sukses të Izmirit por unë jo sepse e shoh çdo ditë në stërvitje dhe i di mundësitë e tij. Jam i bindur se ka për të qenë në mes më të mirëve edhe në Europianin e pas pak ditëve”- është shprehur trajneri që ka nxjerrë shumë kampionë e rekordmenë në garat e kërcimeve por duket se me Izmir Smajlajn po arrin rezultate historike.
www.shkodrasport.com
