Pas ndryshimeve në drejtimin e ekipeve të volejbollit, tek Sportklub Vllaznia duket se kanë planifikuar të bëjnë ndryshime edhe në pankinat e ekipeve të basketbollit.
Drejtuesit e klubit natyrisht që janë detyruar të ndërhyjnë në këtë drejtim duke pasë parasysh edhe dështimin e këtyre ekipeve në sezonin e fundit teksa asnjëri prej tyre nuk arriti të hynte në katërshen e ekipeve më të mira.
Për këtë arsye, bëhet e ditur se mendohet që të ketë lëvizje si tek ekipi i meshkujve ashtu edhe tek i femrave.
Njëkohësisht, thuhet se janë gjetur edhe zëvendësuesit e tyre por deri më tani, ato nuk janë bërë publikë ngaqë më parë duhen zyrtarizuar këto ndryshime.
Ideja është që edhe tek ekipet e basketbollit duhet ndryshuar diçka për mirë. Sidomos tek meshkujt, një ekip që ka qenë elitar por që tashmë nuk është më në të njëjtat nivele.
Edhe tek ekipi i femrave në fakt ka vite që pritet një rritje e nivelit por ndoshta aty ka ndikuar edhe largimi i herëpashershëm i basketbollisteve nga Shkodra.
Nuk përjashtohet mundësia që lëvizje të ketë edhe tek ekipet e të rinjve dhe të rejave të basketbollit por periudha e verës që tashmë ka nisur, sikur i ka kaluar në plan të dytë këto lëvizje.
Gjithsesi, drejtuesit e klubit duhet të marrin sa më shpejt një vendim sepse ekipet do të nisin përgatitjet për sezonin e ardhshëm.
Kjo do të thotë se tek shumësportëshi do të nisë në këtë mënyrë një reformë trajnerësh.
Tek volejbolli ndryshime tashmë janë bërë teksa ekipin e femrave do ta drejtojë Mark Kroqi ndërsa atë të meshkujve Ermal Kraja.
Mbetet për t’u parë se kush do të jenë trajnerët që do të drejtojnë ekipet e basketbollit të Vllaznisë në sezonin e ri.
www.shkodrasport.com
