Paragjykimi i klubit Vllaznia në lidhje me mënyrën e përzgjedhjes së arbitrave të ndeshjes ndaj Tiranës apo dhe disa detaje të tjera në lidhje me qëndrimin e tyre në kryeqytet për disa orë para takimit, ka rënë poshtë.Paolo Maxoleni dhe dy ndihmësit e tij kanë arbitruar në mënyrë perfekte në këtë 90 minutësh shumë delikat për këto dy ekipe dhe në fund, as ata që janë gëzuar dhe as ata që kanë dalë të dëshpëruar nga fusha e lojës, nuk kanë patur kontestimin më të vogël për ta.
Madje, pak minuta më parë, Klubi Vllaznia përmes një postimi në faqen e tij zyrtare ka falenderuar FSHF për mënyrën e përzgjedhjes së këtyre arbitrave dhe po ashtu edhe treshen e arbitrave të cilët nuk u ndikuan nga presioni i lojtarëve dhe i stafeve të të dy skuadrave por vendosën drejtësi në fushën e lojës. Ja reagimi i plotë i klubit kuqeblu:
“Paraditen e djeshme, KF Vllaznia ka ngritur shqetësimin në lidhje me mënyrën e përzgjedhjes së treshes së arbitrave italianë që do të drejtonin ndeshjen Vllaznia- Tirana, por në fakt, tashmë në qetësi të plotë, mendojmë se mënyra si ka vepruar FSHF ka qenë ajo e duhura për të shmanguar edhe presionin e madh që ekzistonte tek arbitrat shqiptarë. Duke kuptuar përgjegjësinë e madhe të këtij institucioni në këtë fundkampionati, na rezulton se ishte vendimi i duhur dhe për më tepër, i pakontestuar nga anjëri ekip pasi arbitrat italianë nuk ndikuan në rezultatin e ndeshjes, përkundrazi ndihmuan në mbarëvajtjen e saj duke shmangur edhe tensionin e krijuar tek futbollistët dhe stafet e të dy ekipeve.Klubi jonë njëkohësisht falenderon edhe arbitrin italian Paolo Maxoleni dhe asistentët e tij për mënyrën e menaxhimit të ndeshjes duke mos ndikuar aspak në fatin e saj. Mbase, ai duhet të jetë një shembull edhe për arbitrat tanë dhe kjo me shumë mundësi do të jetë një mësim për ta”.
