BOKS

Trajneri i Vllaznisë në boks, Zef Gjoni, ka shprehur keqardhjen për dhunën e shfaqur ndaj tre gjyqtarëve post-finales së peshës 69 kg për Kupën e Shqipërisë, ku në ring u ngjitën Asmer Bilali i Vllaznisë dhe Xhulio Vrenozi i Apolonisë. Ndërsa e quan si të patolerueshme incidentin dhe të parin të ndodhur në pallatin e sportit “Qazim Dërvishi”, në qytetin e Shkodrës, Gjoni theksoi se sipas tij fitorja në atë takim i takonte boksierit Bilali.

“Shqipëria ka arritur një sukses në Memorialin ndërkombëtar të boksit”. Kështu është shprehur menjëherë pas fitimit të 3 medaljeve të arta trajneri i Kombëtares, Zef Gjoni. Tekniku shkodran thotë se tre medalistët kanë kaluar parashikimet për këtë aktivitet. Në peshën 49 kg Taulant Zajmi ka mposhtur rusin Valentin Kebokakov 17-15, Rexhildo Zeneli në 56 kg ka mundur 12-9 rusin Uzgan Tigran, ndërsa Kristian Demaj plotësoi suksesin teksa, përveç medaljes së artë ndaj rusit Radoslav Pantalev në 81 kg, u shpall boksieri më i mirë i aktivitetit.

Dy kampionatet më të rëndësishme të boksit, ai i të rriturve dhe ai i të rinjve, këtë vit do të zhvillohen në qytetin e Shkodrës. Federata Shqiptare e Boksit tashmë ka vendosur për këtë gjë. Janë caktuar madje edhe datat e zhvillimit të tyre. I pari do zhvillohet kampionati i të rinjve. Boksierët e ekipeve pjesmarrëse do mbërrijnë në Shkodër më datën 5 shtator dhe një ditë më pas, do nisë zyrtarisht kampionati i kësaj grupmoshe që do zgjasë tre ditë. Ndërkohë kampionati i të rriturve që pritet edhe më me shumë interes, do të startojë më 25 shtator.