VOLEJBOLL

Ekipi i volejbollit të femrave të Vllaznisë e ka nisur me humbje kampionatin. Në ndeshjen e javës së parë, atë të luajtur pasditen e sotme në pallatin e sportit "Ramazan Njala" të Durrësit, vajzat shkodrane janë mundur 0-3 nga Teuta vendase. Seti i parë i ndeshjes ka fiksuar shifrat 25-13 dhe po këto shifra edhe seti i dytë ndërsa në të tretin kemi njëfarë përmirësimi të lojës së tyre dhe për rrjedhojë fiksohet rezultati 25-15. Një humbje e tillë sigurisht që ka qenë e pritshme ngaqë diferencat mes dy ekipeve janë të mëdha si në përbërje ashtu edhe në financa.

Partizani në volejboll për meshkuj ka fituar sot në mbrëmje 3-2 ndaj Vllaznisë në gjysmëfinalen e dytë të play off-it, të luajtur në pallatin e sportit “Qazim Dervishi” të Shkodrës. Skuadra shkodrane, pas triumfit tri ditë më parë në kryeqytet, pati sot një shans të mirë për të eliminuar rivalët e Partizanit, që e mbyllën sezonin e rregullt në vendin e parë. Por volejbollistët e trajnerit Kroqi dështuan në këtë mision, duke bërë që emri i ekipit finalist të vendoset pas tri ditësh, në gjysmëfinalen e tretë, që do të luhet në Tiranë.