Pasditen e djeshme kombëtarja shqiptare U-19 nën drejtimin e trajnerit Erjon Bogdani ka zhvilluar ndeshjen e saj të parë në turneun “Lazio Cup” ku është duke marrë pjesë në Itali. Përballë saj ka qenë Racing Club Roma dhe në përfundim të ndeshjes është fiksuar rezultati i barabartë 0-0. Në formacionin kuqezi në këtë ndeshje të parë ka luajtur me sukses për 90 minuta edhe mbrojtësi shkodran Enes Isufi. Sigurisht që ai ka spikatur me sigurinë e treguar në fushë, ndonëse mosha e tij është shumë e re megjithatë ai premton shumë për të ardhmen.
Siç e dimë, Isufi është vetëm 16.5 vjeç. Ai ka patur moshën për të luajtur në kampionatin e 17 vjeçarëve në sezonin që po mbyllet, por drejtuesit e klubit Vllaznia duke parë aftësitë e tij, e kanë aktivizuar me ekipin U-19 ku ka bërë paraqitje shumë të mira dhe jo më kot, është thirrur edhe në kombëtare nga ana e trajnerit Bogdani. Paraqitjet e fundit edhe me këtë kombëtare kuptohet që janë një garanci për të ardhmen e këtij sportisti dhe jo më kot, Vllaznia pak kohë më parë ka firmosur një kontratë profesioniste me këtë futbollist.
www.shkodrasport.com
