Debati politik ka shpërthyer në Portugali në prag të ndeshjes debutuese të Portugalisë në Botërorin 2026, e cila luhet në Teksas, kundër Republikës Demokratike të Kongos. Çështja lidhet me një ftesë të bërë nga Federata Portugeze e Futbollit për disa figura të larta të parlamentit që të udhëtonin drejt Hjustonit për të ndjekur ndeshjen.
Sipas raportimeve, disa prej krerëve të grupeve parlamentare, kryesisht nga e Djathta dhe Qendra e Djathtë, fillimisht ishin të gatshëm ta pranonin ftesën. Megjithatë, rregullorja e parlamentit portugez ndalon marrjen e dhuratave me vlerë mbi 150 euro, pasi ato mund të ndikojnë në pavarësinë e ushtrimit të mandatit. Edhe pse ekziston një përjashtim për ftesa të drejtuara partive politike dhe jo individëve, situata ka shkaktuar debat të gjerë publik.
Polemika u thellua më tej kur disa deputetë e konsideruan ftesën si të papërshtatshme në një moment kur vendi ka edhe detyrime të rëndësishme politike. Deputeti i së majtës, Fabian Figueiredo, madje i kërkoi Federatës Portugeze të Futbollit që vendin e politikanëve ta zënë persona të prekur nga fatkeqësitë natyrore të dimrit të kaluar ose punonjës të mbrojtjes civile.
Si pasojë e debatit, shumica e krerëve të grupeve parlamentare vendosën ta refuzonin udhëtimin në SHBA. Në Hjuston pritet të jetë i pranishëm vetëm José Pedro Aguiar-Branco, president i Asamblesë së Republikës, parlamentit njëdhomësh portugez.
Ndërkohë, për të shmangur mungesën e deputetëve në një ditë të ngarkuar politike, seanca e zakonshme është zhvendosur një orë më herët, në mënyrë që ligjvënësit të mund të ndjekin ndeshjen në orën 18:00 sipas orës lokale të Portugalisë.
