Atletët e Vllaznisë kanë arritur një tjetër sukses. Në garat e pardjeshme, ato kanë arritur të shpallen fitues të Kupës së Shqipërisë duke grumbulluar në fund të garave plot 142 pikë dhe duke lënë në vend të dytë Tiranën me 68 pikë dhe në të tretin Skënderbeun me 44 pikë. Siç shikohet edhe nga renditja, të dy ekipet e tjera sëbashku nuk kanë arritur të grumbullojnë aq pikë sa Vllaznia e kjo tregon dominimin absolut të saj në këto gara. Por përveçse si ekip, atletët e saj kanë zënë disa vende të para edhe në garat individuale. Kështu, ka spikatur Gledis Halluni që ka zënë vendin e parë në kërcim së gjati me 7.36 m dhe po ashtu edhe në kërcim trehapësh me 14.65 m.
Po ky sportist, është vleërësuar në fund të aktivitetit edhe me kupën e sportistit më të mirë duke grumbulluar 999 pikë olimpike. Vend të parë ka zënë edhe Mario Shestani në 100 m me kohën 11″05. Një figurë shumë të mirë ka bërë edhe atleti tjetër Lulëzim Çengeli që ka zënë vend të parë në dy gara, në 200 m me kohën 22″34 si dhe në 400 m me kohën 49″86.
Ndërkohë në garat e femrave ka spikatur atletja e Vllaznisë Koleta Prenga e cila ka arritur të zërë dy vende të para, pikërisht në hedhjen e gjyles me distancën 7.38 m si dhe në shtizë me distancën 24.92 m.
© shkodrasport.com
