SHKODRANET NEPER BOTE

Trajneri shkodran Samuel Nikaj e ka nisur me barazim karrierën e tij në kampionatin kosovar me ekipi e Flamurtarit të Prishtinës. Në ndeshjen e luajtur pasditen e sotme në fushën e Vitias, është vulosur rezultati përfundimtar 2-2. Një barazim që i lë të dy ekipet në pozitat e mëparshme në renditje, pikërisht Vitian në vendin e gjashtë me 13 pikë ndërsa Flamurtari ndodhet në vendin e nëntë me 12 pikë. Në skuadrën e Flamurtarit, përveç trajnerit, janë edhe tre futbollistë nga Shkodra, pikërisht portieri Ervin Hallunaj, mbrojtësi Erbet Hotaj dhe sulmuesi Jurgen Gjini.

Trajneri shkodran Samuel Nikaj do të jetë trajneri i ri i ekipit Flamurtari i Prishtinës. Akordi është arritur pasditen e sotme dhe shumë shpejt ai pritet të nisë punën me këtë ekip. Lajmi është bërë i ditur nga gazetaolle.com. Ajo ka konfirmuar largimin e trajnerit të mëparshëm dhe emërimin në vend të tij të Nikajt.
Është nënkryetari i klubit, Ymer Ademi, që ka konfirmuar lajmin.

Ish-futbollisti i Vllaznisë së viteve '80 Edmond Lufi siç dihet prej disa vitesh ka nisur të bëjë punën e trajnerit, pasi ka mbyllur karrierën e tij në Maltë. Pikërisht në këtë vend, ai ka nisur punë si trajner dhe së fundi ka drejtuar ekipin Mosta që merrte pjesë në Superligën e këtij vendi. Por vetëm pak ditë më parë, Lufi u detyrua të jepte dorëheqjen nga kjo detyrë sepse rezultatet e skuadrës nuk ishin ato të duhurat. Vendimin e mori pas humbjes brenda në fushën e vet me rezultatin 2-5 ndaj Hamrun Spartans.

Mesfushori shkodran Armando Vajushi ka rezultuar i pafat në aktivizimin e tij tek skuadra e re- Pro Vercelli që militon në Serinë B të futbollit italian. Në ndeshjen e kampionatit të së dielës, ai është dëmtuar rëndë në gjurin e majtë dhe mjekët kanë konstatuar një ropturë të ligamentit krocial anterior të gjurit. Për rrjedhojë ditën e djeshme ai i është nënshtruar ndërhyrjes kirurgjikale e cila ka shkuar në mënyrën më të mirë të mundshme. Sipas informacionit të dhënë nga vetë klubi në faqen e tij zyrtare, lojtari mund të qëndrojë 4-6 muaj larg fushës së blertë për të zhvilluar periudhën e rikuperimit.

Kontratë e re profesionistësh për një tjetër shqiptar në futbollin italian. Bëhet fjalë për Andrea Isufajn, lojtarin e lindur në vendin fqinj por me origjinë nga Kopliku i Malësisë së Madhe. Performanca shumë e mirë që ai ka bërë me ekipin e Arezzos, ka bërë që drejtuesit e Chievo Veronës të hedhin sytë drejt tij dhe pasi janë bindur për potencialin që zotëron, kanë arritur të blejnë kartonin e tij për shumën e 100 eurove. Jo keq, për një futbollist që nuk ka mbushur ende 17 vjeç por që premton shumë.

Këshilli Bashkiak i Malësisë së Madhe ka nderuar dy futbollistët e kombëtares shqiptare Elseid Hysaj dhe Bekim Balaj me titullin e lartë "Qytetar Nderi". Vendimi është marrë në mbledhjen e fundit të këtij Këshilli dhe të gjithë anëtarët e tij kanë dhënë votën unanime për një vlerësim të tillë për dy bashkëqytetarët e tyre të cilët kanë nderuar Malësinë, Shkodrën dhe gjithë Shqipërinë me kontributin e dhënë për kombëtaren shqiptare në Europianin e Francës. Të dy këta futbollistë e kanë origjinën e tyre nga Reçi i Malësisë së Madhe dhe jo më kot, pikërisht prej kësaj zone ka ardhur edhe nderimi i tyre.

Një futbollist shkodran mbërrin tek Akademia e klubit të madh italian dhe botëror- Juventusi. Ai është 14 vjeçari Samuel Rrasa i cili nga ekipi "Djelmënia shkodrane", kaloi tek Brian's dhe tashmë është shumë pranë firmosjen me klubin e madh italin. Një karrierë fantastike që në nisje dhe ky është shansi i madh që i jepet këtij futbollisti të talentuar.

Sulmuesi shkodran Bekim Balaj vazhdon të spikasë me golat e tij në kampionatin kroat të futbollit. Në ndeshjen e djeshme, të vlefshme për javën e tretë të këtij kampionati, 24 vjeçari ka shënuar dy gola duke ndihmuar Rijekën të marrë një barazim në transfertë. Sulmuesi i Kombëtares shqiptare po tregon edhe njëherë formën e mirë. Në transfertë Zagrebit, shkodrani ka shënuar golin e parë të ndeshjes në minutën e 23-të. Por pas dy minutash vendësit barazojnë. Megjithatë, Balaj në minutën e 32-të shënon sërish, por gjithashtu Zagreb përgjigjet përsëri, teksa në minutën e 34-t barazon në 2-2.

Sulmuesi shkodran Xhevahir Sukaj vërtetë mendon të kthehet tek Vllaznia nëse gjërat shkojnë ashtu si duhet megjithatë ai dy ditët e fundit mësohet se ka marrë oferta shumë të rëndësishme nga skuadra të tjera të kampionatit shqiptar. Siç raporton www.telesport.al, e para që i ka telefonuar ka qenë skuadra kampione, ajo e Skënderbeut. Mësohet se ka qenë trajneri i saj Mirel Josa, ai që i ka kërkuar të luajë për korçarët. Raportet e Josës me të janë shumë të mira që nga periudha kur të dy ata kanë punuar sëbashku tek Vllaznia dhe kuptohet që mungesa e një sulmuesi cilësor ka qenë evidente për Skënderbeun në sezonin e fundit. Në rrethana të tilla, Sukaj do ishte zgjidhja perfekte e tij për plotësuar repartin e sulmit.

Armando Vajushi përgenjështron një lajm të publikuar sot në një nga gazetat sportive në të cilat shkruhej se mesfushori shkodran mund të huazohej tek Skënderbeu për ndeshjet e Ligës së Kampioneve. "Po të ishte emri i Vllaznisë aty, edhe mund ta besoja se ishte e vërtetë por mos shkoni deri këtu sa të abuzoni kaq shumë"- shkruan ai në reagimin e bërë në faqen e tij në facebook. Vajushi u transferua në merkaton e janarit tek Chievo Verona dhe ndonëse ende nuk ka gjetur hapësirat e duhura për t'u aktivizuar, ai shpreson që kjo do të ndodhë shpejt.