Edi Reja duhet të jetë i lumtur pasi Bekim Balaj, një nga të paktët sulmues të kombëtares që po aktivizohen rregullisht në këtë sezon, vjen në grumbullimin e kuqezinjve me dy gola të shënuar në kampionat me Shturm Grac.
Në sfidën e sotme kundër Altah, sulmuesi i përfaqësueses shqiptare shënoi golin e avantazhit për skuadrën e tij në minutën e 30 të takimit kur pas një goditje nga këndi, u tregua i aftë të kërcente mes mbrojtësve kundërshtarë dhe të kthente topin në rrjete me një devijim me kokë.
Në minutën e 85-të të takimit erdhi një tjetër gol nga sulmuesi shqiptar, po me një goditje me kokë, duke dyfishuar shifrat për skuadrën e tij, në ndeshjen që u mbyll me rezultatin 2-1 për ekipin e tij dhe e ktheu përsëri në zonën e skuadrave që luftojnë për titullin.
Me këtë dygolësh, Balaj çon në 3 numrin e rrjetave të tundura për ekipin e tij në vetëm 5 ndeshje ku është aktivizuar me Shturm. Futbollisti shënoi në debutimin e tij me këtë skuadër, ndërsa më pas ka qenë titullar i zakonshëm në radhët e austriakëve. /vipsport/
