Shkruar nga Maringlen ZHIVANI
Besëlidhja e Lezhës po hyn në fazën vendimtare të përgatitjeve për sezonin e ri të Kategorisë së Parë, aty ku skuadra lezhjane rikthehet pas një sezoni të suksesshëm në Kategorinë e Dytë. Kampionati i ri do të nisë më 5 shtator 2026, ndërsa shorti e ka vendosur Besëlidhjen përballë Kukësit në transfertë në javën e parë. Përballë një kundërshtari me traditë në futbollin shqiptar, lezhjanët do të kërkojnë ta nisin në mënyrën më të mirë aventurën në një kategori më të fortë dhe më konkurruese.
Pikërisht për këtë arsye, drejtuesit e klubit po i kushtojnë rëndësi të veçantë fazës përgatitore. Skuadra do të udhëtojë drejt Pogradecit, ku për rreth 10 ditë do të zhvillojë një fazë intensive përgatitore, me seanca stërvitore që do të fokusohen në aspektin fizik, taktik dhe tekniko-profesional. Paralelisht me përgatitjet në fushë, Besëlidhja ka qenë aktive edhe në merkato.
Presidenti Pjerin Fushaj ka investuar për ndërtimin e një grupi sa më konkurrues, duke afruar futbollistë që pritet t’i japin më shumë alternativa stafit teknik dhe ta ndihmojnë skuadrën të përballojë nivelin e Kategorisë së Parë. Objektivi është që Besëlidhja të mos jetë thjesht një skuadër që rikthehet në këtë kategori, por të jetë protagoniste dhe të konkurrojë denjësisht me ekipet e tjera.
Për këtë arsye, ditët në Pogradec do të shërbejnë edhe për konsolidimin e grupit dhe përcaktimin e formacionit që do të zbresë në fushë në sfidën e parë të kampionatit. Ndërkohë, entuziazmi duket se nuk mungon as te tifozët.
Pas një sezoni që solli rikthimin në Kategorinë e Parë, Besëlidhja kërkon tashmë të hedhë hapin tjetër. Investimet, përgatitjet dhe mbështetja e tifozëve synojnë ta kthejnë skuadrën lezhjane në një emër të rëndësishëm të kampionatit të ri.
Burimi: Gazeta “SHKODRA SPORT”
