BASKETBOLL

Basketbollistët e Vllaznisë e kanë nisur me fitore kampionatin e ri. Në ndeshjen e parë të tij, ata kanë mundur me rezultatin 70 me 60 ekipin rival të Kamza Basket. Ndonëse u mendua se ky sezon do shfaqte probleme për ekipin shkodran ngaqë në rradhët e tij nuk do kishte asnjë basketbollist të huaj, megjithatë sfida e parë tregoi tjetër gjë. Vllaznia vetëm në periodën e parë hasi pak probleme ndaj kundërshtarit ndërsa në tre të tjerat ka ardhur duke e rritur lojën e saj dhe në fund ka fituar me 10 pikë diferencë. Pikëshënuesit më të mirë në këtë ndeshje për ekipin shkodran kanë qenë Bekteshi me 15 pikë, Berdica me 13 pikë dhe Faslija me 12 pikë.

Duhej të ishte luajtur pasditen e djeshme por në fakt ndeshja e parë e kampionatit kombëtar të basketbollit për meshkuj, ajo në mes Vllaznisë dhe Kamza Basket, do të zhvillohet ditën e hënë në orën 18.00. Ka ndodhur kështu ngaqë pallati I sportit “Qazim Dervishi” ka qenë I zënë me kampionatin kombëtar të boksit për të rinj dhe për këtë arsye, ndeshja e basketbollit është spostuar për në ditën e parë të javës që vjen. Kjo është një ndeshje e rëndësishme pasi basketbollistët shkodranë do të përballen me një nga rivalët e tyre kryesorë siç është ekipi I Kamzës me të cilin gjithë këto vitet e fundit kanë patur një ngërç në ballafaqimet mes tyre dhe në jo pak raste edhe janë mundur. Megjithatë këtë herë shpresohet të jetë ndryshe.

Vllaznia e ka humbur edhe miqësoren e dytë, atë të luajtur ndaj Bashkimit të Prizrenit. Ndeshja është luajtur pasditen e sotme në pallatin e sportit "Qazim Dervishi" dhe në fund të saj është fiksuar rezultati 65-86. Vetëm perioda e parë është dominuar nga vendasit që e kanë fituar atë 16-14 ndërsa në tre të tjerat kuptohet që kosovarët kanë dominuar nisur edhe nga përbërja shumë e mirë që kishin duke arritur ta fitojnë krejt takimin me 21 pikë diferencë. Në krahasim me miqësoren e zhvilluar tre ditë më parë ndaj ekipit të Pejës, këtë herë paraqitja e ekipit shkodran ka qenë krejt tjetër.

Ndeshja e dytë miqësore në mes ekipeve të Vllaznisë dhe Pejës në basketboll për meshkuj që duhej të zhvillohej mesditën e sotme, ka dështuar. Arsyeja ka qenë dalja e ujërave të zeza në ambjentet e pallatit të sportit “Qazim Dervishi” duke e bërë situatën të papërballueshme dhe për rrjedhojë, sportistët e të dy ekipeve pasi kanë parë këtë gjendje janë larguar me një përshtypje jo të mirë dhe për më tepër pa e luajtur ndeshjen në mes tyre. Arsyeja e daljes së ujërave të zeza ka të bëjë me bllokimin e kanalizimit të derdhjes së tyre si shkak I punimeve që po bëhen në stadiumin “Loro Boriçi”.

Situata tek ekipi I basketbollit të meshkujve të Vllaznisë, kampion në fuqi I vendit, nuk duket shumë e mirë. Përveçse nuk është konfirmuar marrja pjesë në Ligën Ballkanike, deri në janar ky ekip nuk do të shfaqet si pretendent as në kampionatin shqiptar. Këtë e tregon më së miri fakti se nuk do ketë asnjë lojtar të huaj të blerë për këtë periudhë dhe po ashtu, edhe dy prej basketbollistëve të sezonit të kaluar, Eni Llazani dhe Fatjon Taraboshi, nuk kanë pranuar të firmosin kontratat e reja.

Shoqata e basketbollit të Vllaznisë ka njoftuar zyrtarisht Federatën Shqiptare dhe përmes saj Ligën Ballkanike se pjesmarrja në edicionin e rradhës të kësaj Lige, është në dyshim për arsye financiare. Ajo që flitej prej kohësh, tashmë është një realitet. Sezoni I kaluar u ka shërbyer shkodranëve për të testuar veten në këtë Ligë ndërkohë që sivjet mendohej të bëheshin gjëra më të mira por kjo nuk mund të ndodhë. Për të konfirmuar pjesmarrjen në edicionin e dytë rradhazi, duhet që Vllaznia të paguajë një shumë prej 15 mijë eurosh në arkën e kësaj Lige por pikërisht gjetja e kësaj shume është problem.

Lajme të mira nga ekipi i basketbollit të meshkujve të Vllaznisë. Drejtuesit e shoqatës kanë nisur të bëjnë planet për sezonin e ri ku natyrisht ideja është për të mbrojtur titullin kampion por njëkohësisht mendohet edhe një pjesmarrje sërish në Ligën Ballkanike. Por për t'i bërë të dyja këto, natyrisht që duhet një skuadër cilësore dhe për këtë arsye, po mendohet se çfarë duhet bërë. Natyrshëm që dyshimet janë tek ana financiare sepse duhet mbështetje dhe për këtë arsye, drejtuesit e shoqatës mësohet se kanë dërguar një projekt në Bashkinë e Shkodrës për këtë gjë.