Vllaznia e sivjetme po bën mirë në kampionat dhe në shtatë ndeshjet e para të tij ka arritur të grumbullojë 12 pikë dhe duke qenë kësisoj në krye të renditjes me pikë të njëjta me Bylisin, Skënderbeun dhe Teutën.
Kjo konsiderohet një arritje për shkodranët, nisur edhe nga problematikat me të cilat e nisën këtë sezon, por në fakt konsiderohet arritje edhe për një arsye tjetër.
Ata rrallëherë kanë marrë kaq shumë pikë në nisje të kampionateve. Mjafton t’u referohemi 15 kampionateve të fundit të Superligës ku ato kanë marrë pjesë vetëm në një rast kanë arritur të grumbullojnë më shumë pikë.
Ka ndodhur në sezonin 2004-2005 kur pas javës së shtatë të kampionatit, Vllaznia kishte grumbulluar plot 15 pikë. Që atëherë në asnjërin kampionat kuqeblutë nuk kanë grumbulluar kaq pikë.
Në dy kampionate, ata kanë arritur të grumbullojë po 12 pikë, aq sa edhe sivjet, pikërisht në sezonin 2008-09 kur Vllaznia ishte pretendente për titullin kampion nën drejtimin e trajnerit Agim Canaj dhe në fillim të sezonit 2012-2013 kur ekipi nën drejtimin e Shpëtim Duros e nisi mirë kampionatin por më pas lëshoi pe rrugës. Ja ecuria e Vllaznisë në 15 kampionatet e fundit, pas 7 javëve të para të tyre:
2019- 2020 12 pikë
2017- 2018 5 pikë
2016- 2017 7 pikë
2015- 2016 4 pikë
2014- 2015 11 pikë
2013- 2014 10 pikë
2012- 2013 12 pikë
2011- 2012 10 pikë
2010- 2011 11 pikë
2009- 2010 7 pikë
2008- 2009 12 pikë
2007- 2008 9 pikë
2006- 2007 10 pikë
2005- 2006 7 pikë
2004- 2005 15 pikë
