SHKODRANET NEPER BOTE

Armando Vajushi do të luajë për klubin italian të Udinezes, duke filluar nga janari i vitit 2014. Kjo behet e kryer ne shtetin ku ai po luan aktualisht. Dje mediat bullgare kanë zbuluar se presidenti i Liteksit, Grisha Gançev, ka arritur një marrëveshje me homologun e tij italian, Xhiampaolo Poco. “Gançev ka biseduar së fundmi me drejtuesit e Udinezes dhe futbollisti shqiptar pritet t’i bashkohet nga janari skuadrës friulane. Për shërbimet e tij Udineze do të paguajë 1.2 milionë euro te Liteksi, ndërsa paga e lojtarit ende nuk bëhet e ditur.

Një tjetër shkodran arrin të hedhë firmë jashtë vendit. Kështu 21-vjeçari nga Shkodra, Saimir Hyseni, është bërë pjesë e futbollit gjerman duke firmosur me skuadrën e klubit VFR Burstadt 1910, për një periudhë njëvjeçare. Kështu, pas Telit, Salihit, Sukajt, Balës, Vajushit, Hasanit e Hysajt një tjetër shkodran do të shkojë jashtë vendit. Hyseni, ka qenë një nga mesfushorët më të spikatur të Akademisë së Futbollit Vllaznia, e cila drejtohet nga dyshja Nikaj-Dibra. Lajmin për një akord të tillë e ka konfirmuar edhe klubi gjerman që merr pjesë në Kategorinë e Katërt përmes faqes së tij të internetit.

Futbollisti shkodran Armando Vajushi shfaqet sërish si protagonist me skuadrën e tij Liteks Lovech. Në ndeshjen e luajtur pasditen e sotme dhe të vlefshme për javën e 17-të të kampionatit bullgar, kjo skuadër ka patur përballë Pirin Gotse Dolchev dhe në fund të 90 minutave është fiksuar rezultati 5-1. Pjesa e parë e ndeshjes është mbyllur në shifrat 3-0 dhe autorë të tre golave kanë qenë shqiptarët Vajushi dhe Gjasula. Shkodrani ka shënuar në minutat 4 dhe 7-të ndërsa tiranasi në minutën e 38-të. Në pjesën e dytë ndërkohë ka patur edhe gola të tjerë teksa të pestin e ka shënuar Gjasula nga pika e bardhë e penalltisë në minutën e 74-të.

Pas golave të djeshëm të dy sulmuesve shkodranë Hamdi Salihi dhe Armando Vajushi, është "kundërpërgjigjur" sot shkodrani tjetër- Bekim Bala. Ai ka shënuar plot 2 gola në fitoren e skuadrës së tij Jagiellonia në kampionatin polak të futbollit në ndeshjen ndaj Ruch Chorzow. Bjondi shkodran ka kontribuar kësisoj në fitoren e thellë 6-0 të skuadrës së tij ndaj këtij kundërshtari. Bala ka shënuar pikërisht dy golat e fundit të kësaj ndeshje, të pestin në minutën e 64-të dhe të gjashtin në minutën e tretë shtesë të ndeshjes. Në këtë mënyrë, sulmuesi shkodran vazhdon të bëjë një paraqitje të mirë edhe me skuadrën e tij të re, me të cilën është bashkuar këtë verë.

Ditë e mbarë ka qenë kjo e sotmja edhe për dy futbollistët shkodranë që luajnë në kampionatet e ndryshme të botës. Hamdi Salihi ka shënuar për Jiangsu në Kinë ndërsa Armando Vajushi për Liteks në Bullgari.Por në fakt vetëm goli i këtij të fundit ka vlejtur disi për ekipin ngaqë i ka dhënë barazimin skuadrës së tij. Liteks ka luajtur në shtëpi me Sllavian e Sofjes dhe kanë qenë miqtë ata që kanë shënuar në pjesën e parë me anë të Ivanov. Ndërkohë Vajushi ka arritur ta dërgojë topin në rrjetë në minutën e 59-të duke barazuar shifrat dhe me rezultatin 1-1 ka përfunduar e gjithë ndeshja.

Mesfushori 21 vjeçar shkodran Edon Hasani ka ndërruar ekip. Ai ka lënë Liteksin në Bullgari dhe ka kaluar në një kampionat tjetër, atë të Rumanisë. Skuadra me të cilën ai ka firmosur është FC Ceahlaul që merr pjesë në Superligën e këtij vendi. Siç merret vesh, kontrata e firmosur është trevjeçare. Në këtë mënyrë, FC Ceahlaul do të jetë skuadra e tretë në karrierën e këtij futbollisti që ka qenë edhe pjesë edhe e të gjitha ekipeve kombëtare deri tek Shpresat. Hasani është konsideruar në nga elementet më me perspektivë të futbollit shkodran në këto vitet e fundit megjithatë loja e tij nuk ka dalë shumë në pah edhe për shkak të disa dëmtimeve të njëpasnjëshme.

Sulmuesi shkodran Hamdi Salihi vazhdon të shënojë në Kinën  e largët. Ai e ka bërë këë gjë edhe ditën e djeshme teksa ka shënuar dy gola për skuadrën e tij, duke e ndihmuar atë të fitojë 3-0 ndaj kundërshtarit të rradhës. Jiangsu, skuadra ku luan shkodrani ëshë ndeshur me Qiangso. Ka qenë pikërisht Salihi ai që ka zhbllokuar rezultatin në minutën e 35-të. Pjesa e parë e ndeshjes është mbyllur me këtë gol ndërsa në minutën e 64-të ka shënuar një tjetër futbollist golin e dytë ndërkohë që Salihi në minutën e 73-të do të shënonte edhe golin e tretë të ndeshjes dhe të dytin për të personal. Ka qenë një kros nga e djathta dhe sulmuesi i kombëtares shqiptare ka kërcyer bukur me kokë duke e dërguar topin në rrjetë. Në këtë mënyrë, me këtë rezultat është mbyllur krejt ndeshja dhe me këtë trepikësh të marrë, Jiangsu është ngjitur në kuotën e 20 pikëve duke qenë në vendin e gjashtë në renditje.