Elvin Beqiri “skanon” Tërbunin. Pasi u mbyll faza e parë dhe kanë kaluar disa ditë nga ndeshja e fundit, trajneri e ka më të thjeshtë që të bëjë bilancin. Është i kënaqur me ecurinë, por evidenton mangësitë në vijën e parë. Gjatë një deklarate të dhënë për “Panorama Sport”, komenton edhe merkaton dhe planet që kanë në janar.
“Jam i kënaqur me fazën e parë në kompleks, por jo me ndeshjen e fundit. Me Korabin e pësuam për dy minuta. Nuk e prisja ta lëshonim ashtu lojën. Deri në minutën e 80-të ishim të barabartë me Korabin. E dinim që ishte një fushë e vështirë, por çaluam në vijën e parë.
Sulmuesit ishin shumë të rezervuar para portës kundërshtare. Ndërsa mbrojtja mendoj se ka qenë më e mira në Kategorinë e Parë. Gjatë kësaj faze kemi pësuar vetëm dy humbje. Kemi pësuar gjithsej 6 gola dhe kemi shënuar 9 të tillë, kemi marrë 8 barazime dhe 5 fitore.
Merkato? Do të afrojmë 5 lojtarë cilësorë gjatë merkatos së janarit. Kjo do të jetë në shërbim të arritjes së objektivit sezonal. Afrimet do të jenë nga Superiorja, por edhe nga tregu i huaj. Në 5 janar do të rifillojmë seancat stërvitore të vlefshme për fazën e dytë të kampionatit.
Këtë fazë e shoh se do të jetë më e fortë se e para. Të gjitha ekipet pretendojnë të ngjiten në elitë. Falënderoj presidentin Gjon Gjonaj për mbështetjen dhe kontributin financiar që ka dhënë për ekipin. Falënderues i jam gjithë tifozërisë pukjane për mbështetjen”, përfundoi tekniku shkodran i pukjanëve.
Nga sa behet e ditur, Beqiri ka hedhur syte nga Vllaznia dhe do te kerkoje te marre ndonje lojtar qe nuk ka gjetur hapesirat e duhura gjate gjysmes se pare te sezonit.
