Ish-sulmuesi uruguaian Dario Silva i ka prekur të gjithë me rrëfimin e tij. Në një prononcim për televizionin spanjoll “Jugones”, 46-vjeçari tregon të gjitha peripecitë që ka kaluar në jetën e tij, teksa tashmë punon si kamarier në një piceri në Malaga.
Sulmuesi i cili numëron plot 114 gola në karrierën e tij si profesionist zbulon edhe shkaqet që e çuan deri në këtë pikë.
“Lashë futbollin në vitin 2006, pasi mësova se babait tim i kishin mbetur edhe 3 muaj jetë. Më pas, në shtator të vitit 2006 pësova një aksident, ku pata probleme me këmbën e djathtë dhe mjekët bënë art, duke mundësuar lëvizjen time sërish. Aktualisht punoj si kamarier, pasi menaxherët më kanë marrë thuajse gjithçka. Ata menaxhuan paratë e mija dhe bënë atë që donin””, tregon Dario Silva.
Gjatë karrierës së tij uruguaiani ka veshur fanellën e Kaljarit, Epanjolit, Malagas, Sevijas dhe Portsmuthit. Me kombëtaren Dario Silva numëron 49 paraqitje teksa arriti të shënonte 14 gola.
