Trajneri i Çelsit, Tomas Tuhel, nuk e ka fshehur kurrë admirimin që ka për yllin e Dortmundit, Erling Haland. Por konkurrenca me skuadrat e tjera dhe çmimi i lartë që ka futbollisti, e bën të vështirë kalimin e norvegjezit në Angli.
“Kemi folur me drejtuesit për mundësinë për të marrë Haland, por rrethanat e bëjnë të pamundur këtë operacion”,- u shpreh 48 vjeçari.
Kështu që blutë e Londrës kanë hedhur sytë nga Italia për të përforcuar ekipin për sezonin e ardhshëm. Sipas të përditshmes “La Gazzetta dello Sport”, anglezët shikojnë sulmuesin e Fiorentinës, Dushan Vlahoviç si një opsion për të ardhmen.
21-vjeçari ka tërhequr vëmendjen e shumë klubeve të mëdha dhe Çelsi synon të “djegë” konkurrencën. Kontrata e sulmuesit skadon në qershorin e vitit 2023, dhe ai nuk ka ndërmend të zgjasë marrëveshjen me klubin vjollcë.
Gjatë verës për serbin ishte e interesuar dhe Atletiko Madrid, me spanjollët të cilët ofruan rreth 60 milionë euro, shumë kjo që u refuzua nga Fiorentina. Në sezonin e kaluar Vlahoviç shënoi 21 gola në kampionatin italian, ku mori dhe çmimin si talenti i vitit.
