ATLETIKE

Atleti shkodran Izmir Smajlaj ka thyer rekordin kombëtar në garën e kërcimit së gjati. Ai ka barazuar rezultatin 7.75 metra të mbajtur më parë nga shkodrani Admir Bregu megjithatë konsiderohet rekord nga ana e Federatës Shqiptare të Atletikës sipas rregulloreve që ajo ka. Rekordi i ri është vendosur në garat e zhvilluara pasditen e së enjtes në pistën e stadiumit “Loro Boriçi” në “ditën e kërcimeve”, aktivitet ky që mban emrin e kampionit të mirënjohur Hysni Bebeziqi. Smajlaj që në kërcimin e tij të parë ka arritur të thyejë rekordin dhe për rrjedhojë ai është shprehur i lumtur për këtë sukses por ka premtuar njëkohësisht edhe të tjerë shumë shpejt.

Të premten në Tiranë do të zhvillohet kampionati Individual Dimëror në atletikë. Kjo është gara e parë sezonale për atletët tanë që në fakt duhej të zhvillohej në salla të mbyllura por në mungesën e një salle të tillë, në Shqipëri çuditërisht vazhdohet sërish të zhvillohet në ambjente jashtë. Garat do të zhvillohen në pistën e stadiumit "Qemal Stafa" dhe shpresat janë që të paktën të mos ketë reshje shiu për të ndikuar në rezultatet e sportistëve. Ekipi i Vllaznisë pritet të marrë pjesë me sportistët e tij më të mirë në këto gara dhe natyrisht që pretendon disa vende të para.