VOLEJBOLL

Vllaznia në volejboll për meshkuj ka bërë një hap të gabuar në ndeshjen e parë gjysmëfinale të kampionatit. Ndonëse ka luajtur në Shkodër, ajo është mundur 1-3 nga ekipi I Tiranës dhe tashmë vështirësitë për të kaluar në finale janë më të mëdha për djemtë e trajnerit Kalaja ngaqë takimi I dytë, ai përcaktues për këtë gjë, do të luhet të shtunën në Tiranë. Ndeshja në fakt ka patur shumë emocione. Në setin e parë ka patur shumë rivalitet dhe në shtesë ka fituar Tirana 29 me 27. Në të dytin është Vllaznia që fiton 25 me 22 duke barazuar shifrat e seteve dhe kur pritej që në setin e tretë të ishte ajo sërish fituese ngaqë udhëhiqte me 7 pikë epërsi, disa gabime të njëpasnjëshme bëjnë që Tirana të fitojë 25 me 22.

Vendi i mbetur bosh në pankinën e ekipit të volejbollit të të rejave të Vllaznisë nga largimi i trajnerit Adrian Mikopli për tek të rriturit, është plotësuar brenda pak ditësh. Trajnerja e re është Ana Gjelaj, ish- volejbollistja e njohur e Vllaznisë por edhe e kombëtares shqiptare. Prezantimi me ekipin e të rejave është bërë nga ana e inspektorit të lojërave me dorë në klubin Vllaznia, Beniamin Idrizi.

Pas largimit të Anton Qafarenës drejt Gjermanisë, ekipi i volejbollit të meshkujve të Vllaznisë mund të ketë një tjetër firo. Dhe sërish bëhet fjalë për një Qafarenë tjetër, vëllai më i madh në moshë, Nikolini. Ekipi ka rreth dy-tre javë që ka nisur stërvitjen nën drejtimin e trajnerit Adrian Mikopli por në seancat e zhvilluara ka munguar lojtari më veteran i tij.