Ka vetëm pak kohë që i është bashkuar këtij ekipi dhe është menjëherë pjesë e suksesit të Kupës së Shqipërisë.
Arben Parmeza është mësuar gjatë karrierës së tij sportive si atlet i Vllaznisë duke fituar trofe por si trajner nuk e kishte përjetuar këtë emocion.
Kjo tashmë u bë realitet dhe ai ndjehet mjaft mirë. Në një prononcim për gazetën “Shkodra Sport” pas fitores së djeshme ndaj Tirana AS në finalen e Kupës, ai është shprehur:
“Për mua është kënaqësi e veçantë që e fitoj këtë trofe. Më duket se jam kthyer në origjinë.
Në fakt në jetën time sportive jam mësuar me kupa, rekorde e tituj kampionë ndërsa si trajner nuk e kisha përjetuar një gjë të tillë deri më tani.
Ky është trofeu im i parë që fitoj dhe këto janë emocionet e para që përjetoj.
Merita i takon këtij ekipi fantastik, punës së palodhur të trajnerëve e stafit, menaxhimit fantastik të presidentit.
Ndjehem shumë mirë që tashmë jam pjesë e këtij ekipi fitues, pranë stafit, për të dhënë më të mirën time.
Për të dhënë maksimumin që të vazhdojmë në këtë rrugë të mrekullueshme suksesesh që ka ekipi i Vllaznisë së femrave në futbollin shqiptar.
Objektivi i këtij ekipi është të luftojë me vetveten, të punojmë fort për të rritur nivelin e këtyre vajzave, jo vetëm për të fituar tashmë edhe titullin kampion të këtij sezoni.
Por edhe për një pjesmarrje sa më dinjitoze në Champions League për të synuar kalimin e turit të parë”-është shprehur Arben Parmeza.
www.shkodrasport.com