ATLETIKE

Një grup atletësh të rinj të Vllaznisë kanë marrë pjesë ditët e fundit në një turne ndërkombëtar që u zhvillua në Split të Kroacisë. Në këtë turne kanë marrë pjesë sportistë nga vendet ballkanike që lagen nga Deti Adriatik, pra Kroacia, Sllovenia, Bosnja, Mali i Zi dhe Shqipëria. Kjo e fundit është përfaqësuar nga sportistët e ekipit të Vllaznisë të drejtuar nga trajnerët Albert Marashi dhe Fatjon Serhati. Garat janë zhvilluar për moshën deri 15 vjeç dhe kanë patur rivalitet. Atletët e rinj shkodranë janë përfaqësuar përgjithësisht mirë duke merituar edhe dy medalje bronzi.

Në median e shkruar sot është raportuar për një kalim të atletit shkodran Izmir Smajlaj nga Vllaznia tek ekipi i Studentit. Sipas asaj çfarë shkruhej në një të përditshme sportive, kampioni dhe rekordmeni i garave të kërcimit së gjati dhe trehapësh, kishte vendosur të braktiste klubin e qytetit të tij për të kaluar në kryeqytet, aty ku i kanë ofruar pagesa më të mira dhe kushte më të mira stërvitje. Madje për këtë, kishte një prononcim edhe të drejtorit të klubit Studenti Blendi Nallbani.

Fillimisht ishte Vera Bregu, më pas Admir Bregu e tani është Izmir Smajlaj. E përbashkëta e tyre janë titujt kampion dhe rekordet e thyera. Por jo vetëm kaq. E përbashkëta kryesore është se të tre ata kanë punuar me një trajner: profesor Vildan Tufin. Ai ndjehet i lumtur për gjithçka ka arritur deri tani megjithatë nuk dëshiron të ndalet këtu.

Tjetër sukses për atletin shkodran Izmir Smajlaj. Në garat e zhvilluar ditën e djeshme në Erevan të Armenisë, ai ka zënë vendin e parë duke merituar  medaljen e artë. Një sukses i madh i këtij sportisti duke parë edhe sportistët e tjerë pjesmarrës në këtë turne ndërkombëtar të përvitshëm që zhvillohet çdo vit në këtë vend. Një turne i cili zhvillohet vetëm në disiplinën e kërcimit së gjati dhe ku marrin pjesë sportistë nga vende të ndryshme të Europës. Smajlaj ka arritur të kërcejë 7 metra e 85 centimetra, më shumë se gjithë të tjerët duke merituar vendin e parë dhe duke u ngjitur më pas në podium ku i është vendosur në qafë edhe medalja e artë e këtij aktiviteti.

Dy emra të mëdhenj të atletikës shkodrane (njëkohësisht edhe asaj shqiptare), pikërisht Oltion Luli dhe Niko Laro, janë zgjedhur dje anëtarë të kryesisë së Federatës Shqiptare të Atletikës. Ka ndodhur kështu pas votimeve të bëra në Asamblenë Zgjedhore të kësaj Federate që u zhvillua në Elbasan, aty ku presidenti aktual Gjergj Ruli është rikonfirmuar në këtë post edhe për katër vitet e ardhshme. Më pas është kaluar tek votimi për anëtarët e kryesisë. Janë propozuar 8 vetë për 6 anëtarët e rinj të kësaj kryesie dhe ndër to kanë qenë të propozuar edhe tre shkodranët, Oltion Luli, Niko Laro dhe Arben Mlloja.

Për herë të parë në historinë e atletikës shqiptare një sportist i joni arrin të kualifikohet për në fazën finale të Kampionatit Europian. Ka ndodhur kështu pasditen e sotme me atletin shkodran Izmir Smajlaj i cili në garat e kampionatit që është duke u zhvilluar në Amsterdam, ka arritur të kërcejë 7.92 metra duke u kualifikuar kësisoj për në finalen e ditës së nesërme. Sigurisht që ky është një sukses i madh i këtij sportisti që vazhdon të rikonfirmojë formën e tij shumë të mirë sportive të kohëve të fundit, që u shoqëruan edhe me thyerjen e dy rekordeve në garat e kërcimit së gjati dhe atë trehapësh.

Vllaznia në atletikë për meshkuj është shpallur pasditen e djeshme kampione e Shqipërisë për të tetin vit rradhazi. Ky ka qenë verdikti i kampionatit të zhvilluar për dy ditë me rradhë në Elbasan, në garat e të cilit kanë dominuar atletët shkodranë që kanë grumbulluar më shumë pikë se çdo ekip tjetër dhe për këtë arsye, ata janë shpallur më të mirët edhe për këtë vit. Kryetrajneri i ekipit të Vllaznisë Albert Marashi në një prononcim për gazetën shkodrasport.com, ka falenderuar të gjithë sportistët dhe trajnerët për këtë sukses të rradhës.

Ditë aktivitetesh ndërkombëtare për atletët e Vllaznisë do të jenë ato që do vijnë në vijim. Më datë 1 qershor, sportistët shkodranë do të kenë mundësi që të marrin pjesë në dy turne ndërkombëtarë që zhvillohen njëkohësisht në San Marino dhe në Bosnjë. Në San Marino do të marrë pjesë atleti rekordmen I Shqipërisë në garën e kërcimit së gjati Izmir Smajlaj bashkë me trajnerin e tij Vildan Tufi. Por jo vetëm kaq. Organizatorët e këtij aktiviteti I kanë ofruar sportistit tonë edhe një javë stërvitje në kushte të shkëlqyera në këtë vend dhe kjo është arsyeja pse është zgjedhur San Marino për këtë pjesmarrje.